ដោយ ៖ មរតក ថ្ងៃទី 15 សីហា 2012ម៉ោង 10:26:29
ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានថ្លែងបញ្ជាក់ទៅ កាន់និស្សិតជ័យលាភីមកពីសាកលវិទ្យាល័យបៀលប្រាយប្រមាណជាង៥.០០០នាក់ នៅក្នុងឱកាសដែលសម្ដេចអញ្ជើញជាអធិបតីដ៏ខ្ពង់ខ្ពស់ប្រគល់សញ្ញាបត្រនៅមជ្ឈមណ្ឌលសន្និបាតនិងពិព័រណ៍កោះពេជ្រថា ការរីកចម្រើនវិស័យ អប់រំនៅកម្ពុជារហូតដល់និស្សិតអាចបញ្ចប់ការសិក្សានិងទទួលសញ្ញាបត្រនាពេលនេះ គឺដោយសារតែការដឹកនាំដ៏ត្រឹម ត្រូវរបស់រាជរដ្ឋាភិបាល ក្រោមការដឹកនាំរបស់គណបក្សប្រជាជនកម្ពុជា ។
សម្ដេចបានរំលឹកទៅកាន់ក្រុមនិស្សិតដែរ ថា នៅពេលដែលសម្ដេចបានក្លាយជានាយករដ្ឋមន្ដ្រីការបរទេសភ្លាមៗ គឺសម្ដេចបានដើរសុំអាហារូបករណ៍ពីបរទេស ដើម្បីបញ្ជូនកូនខ្មែរេឱ្យទៅរៀនដូចជានៅអឺរ៉ុបជាដើម ដូច្នេះបើបរទេសផ្ដល់អាហារូបករណ៍ឱ្យរដ្ឋាភិបាល ហើយរដ្ឋាភិ បាលមិនបានបញ្ជូនឈ្មោះលោក លោកស្រីទៅរៀន ក៏លោក លោកស្រីគ្មានឱកាសទៅរៀនដែរ ។ សម្ដេចបញ្ជាក់ថា មានអ្នកខ្លះមិនហ៊ានទទួលស្គាល់ការពិត ទទួលស្គាល់ខ្លួនឯង តើដឹកនាំប្រទេសជាតិយ៉ាងម៉េច បើសូម្បីតែគ្រួសារ ប្ដី ក៏ហ៊ានក្បត់ដែរនោះ ។
ការថ្លែងបញ្ជាក់បែបនេះ បើទោះបីជាសម្ដេចតេជោមិនបានបង្ហាញឈ្មោះ ប៉ុន្ដែគឺគេអាចដឹងថា សំដៅទៅលើលោកស្រី លី ស្រីវីណា តំណាងរាស្ដ្រមកពីគណបក្សសម រង្ស៊ី ខណៈលោកស្រីកាលពីថ្ងៃទី៩ ខែសីហា ឆ្នាំ២០១២ នៅក្នុងរដ្ឋសភាបានបដិសេធថា អាហារូបករណ៍ដែលលោកស្រីទទួលបានទៅសិក្សានៅប្រទេសប៉ូឡូញ ដែលធ្វើឱ្យលោកស្រីមានចំណេះដឹងមកប្រឆាំងជាមួយរាជរដ្ឋាភិបាលដូចសព្វថ្ងៃនេះ គឺបរទេសជាអ្នកផ្ដល់ឱ្យ មិនមែន រដ្ឋាភិបាលកម្ពុជាសម័យនោះទេ៕