ភ្នំពេញ: សកម្មជនសិទ្ធិមនុស្ស លោក ចាន់ សាវ៉េត បានឲ្យដឹងនៅព្រឹកថ្ងៃទី១៥ ខែសីហា ឆ្នាំ២០១២ លោកនឹងចូលបំភ្លឺ នៅព្រឹកថ្ងៃទី២៤ ខែសីហា ឆ្នាំ២០១២ ចំពោះមុខចៅក្រមស៊ើបសួររបស់តុលាការ សាលាដំបូងរាជធានីភ្នំពេញ តាមដីកាបង្គាប់ ដែលបានកោះហៅលោក ក្នុងរឿងផ្តល់មធ្យោបាយ ជួយដល់ជនជាប់ចោទ ពាក់ព័ន្ធនឹងជម្លោះដីធ្លី នៅស្រុកឆ្លូង ខេត្តក្រចេះ។
ជាមួយនឹងការលើកឡើងដូច្នេះ លោកចាន់សាវ៉េត ក៏បានបង្ហាញក្តីព្រួយបារម្ភ ខ្លាចមានការឃាត់ខ្លួនរូបលោក ខណៈដែលលោកចូលបំភ្លឺតាមដីការបស់ចៅក្រម នាព្រឹកថ្ងៃទី២៤សីហា ឆ្នាំ២០១២។
យ៉ាងណាក៏ដោយ លោក ចាន់ សាវ៉េត បានបដិសេធ ដាច់អហង្កា ចំពោះការចោទប្រកាន់ ក្នុងរឿងផ្តល់មធ្យោបាយ ជួយដល់ជនជាប់ចោទ រត់គេចខ្លួន ពាក់ព័ន្ធនឹងជម្លោះដី នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ។ ជម្លោះដីធ្លីនោះ ត្រូវបានអាជ្ញាធរ បង្ក្រាបលើក្រុមប្រជាពលរដ្ឋ ដែលជាប់ចោទថា បានចាប់ដី និងបង្កើតតំបន់អបគមន៍ កាលពីថ្ងៃទី១៦ ខែឧសភា ឆ្នាំ២០១២។ តំណាងសមាគមប្រជាធិបតេយ្យរបស់លោកម៉មសូណង់ដូ ចំនួន ៥ នាក់ ដែលរួមទាំងឈ្មោះ ប៊ុន រដ្ឋា ត្រូវបានតុលាការខេត្តក្រចេះ ចេញដីកាតាមរកចាប់ខ្លួន។
ក្នុងនោះ មានជនជាប់ចោទម្នាក់ឈ្មោះ ប៊ុនរដ្ឋា បានមកស្នាក់អាស្រ័យ ជាមួយនឹងសកម្មជនអង្គការសិទ្ធិមនុស្ស នៅភ្នំពេញ មុននឹងបន្តដំណើរ ចេញទៅប្រទេសថៃ ដោយឆ្លងកាត់ប្រទេសឡាវ។
ជាការកត់សម្គាល់ ដីកាបង្គាប់ឲ្យចូលខ្លួន ចុះហត្ថលេខាដោយលោក ឆែ វីរៈ ចៅក្រមស៊ើបសួររបស់តុលាការសាលាដំបូងរាជធានីភ្នំពេញ ចុះថ្ងៃទី៩ ខែសីហា ឆ្នាំ២០១២ បានតម្រូវឲ្យលោក ចាន់ សុវ៉េត ចូលបំភ្លឺពីដំណើររឿង ផ្តល់ជំនួយដល់ចារីជាអាទិ៍ ប្រព្រឹត្តនៅរាជធានីភ្នំពេញ កាលពីខែឧសភា ឆ្នាំ២០១២ តាមបញ្ញត្តិ មាត្រា ៥៤៤ នៃក្រមព្រហ្មទណ្ឌ។
ក្នុងដីកាដដែលនោះ លោកចៅក្រម បានព្រមានថា "ក្នុងករណី លោក ចាន់ សាវ៉េត មិនចូលខ្លួនតាមកាលកំណត់ខាងលើនេះទេ យើងនឹងចេញដីកាបង្គាប់ឲ្យនាំខ្លួន"។
តែដីកានោះ មិនបានបញ្ជាក់ថា ការចោទប្រកាន់លើសកម្មជនសិទ្ធិមនុស្សអាដហុក ដូច្នេះ តើរដ្ឋាភិបាល ឬក៏អាជ្ញាធរខាងណា ជាដើមបណ្តឹងនោះឡើយ។
ចំពោះការប្តឹងចោទប្រកាន់លោក ចាន់ សាវ៉េត ប្រធានក្រុមស៊ើបអង្កេតរបស់អង្គការសិទ្ធិមនុស្សអាដហុក ពាក់ព័ន្ធនឹងជម្លោះដីធ្លី នៅស្រុកឆ្លូង ខេត្តក្រចេះ ត្រូវបានសមាគមសិទ្ធិមនុស្ស អាដហុក ចេញសេចក្តីថ្លែងការណ៍ ដោយសំដែងក្តីបារម្ភយ៉ាងខ្លាំង។
សេចក្តីថ្លែងការណ៍ចំហ ចុះថ្ងៃទី១៤សីហា ឆ្នាំ២០១២ បង្ហាញថា សមាគមសិទ្ធិមនុស្ស អាដហុក សូមសំដែងការព្រួយបារម្ភយ៉ាងជ្រាលជ្រៅបំផុត ចំពោះដីកាបង្គាប់ឲ្យចូលខ្លួន ដែលចេញដោយលោក ឆែ វីរៈ ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី៩ ខែសីហា ឆ្នាំ២០១២។ លោកចាន់សាវ៉េត ជាអ្នកស៊ើបអង្កេតជាន់ខ្ពស់ និងជាអនុប្រធានផ្នែកត្រួតពិនិត្យសិទ្ធិមនុស្ស របស់សមាគមអាដហុក ត្រូវបានកោះហៅឲ្យចូលបំភ្លឺនៅមុខចៅក្រមស៊ើបសួរ ឆែ វីរៈ នៅម៉ោង ៨ និង ៣០ នាទីព្រឹកថ្ងៃទី២៤ ខែសីហា ឆ្នាំ២០១២។
សេចក្តីថ្លែងការណ៍ លើកឡើងថា លោកចាន់សាវ៉េត អាយុ ៤៤ ឆ្នាំ ត្រូវបានគេចោទប្រកាន់ថា បានផ្តល់ជំនួយដល់ចារីជាអាទិ៍ ( អ្នកប្រព្រឹត្តបទឧក្រិដ្ឋ ) ប្រព្រឹត្តនៅរាជធានីភ្នំពេញ កាលពីខែឧសភា ឆ្នាំ២០១២ តាមបញ្ញត្តិ មាត្រា ៥៤៤ នៃក្រមព្រហ្មទណ្ឌ។ ការចោទប្រកាន់នោះ អាចនឹងឲ្យលោកចាន់សាវ៉េត ជាប់ពន្ធនាគារពី ១ ឆ្នាំ ទៅ ៣ ឆ្នាំ។
សេចក្តីថ្លែងការណ៍ដដែល បានបន្ថែមថា កាយវិការនៃការប្រើប្រាស់ប្រព័ន្ធតុលាការលើសកម្មជនសិទ្ធិមនុស្សដូច្នេះ គ្មានអ្វីក្រៅពីការគម្រាមកំហែង និងបំភិតបំភ័យលើអ្នកការពារសិទ្ធិមនុស្ស ហើយរារាំងពួកគេ មិនឲ្យបំពេញកិច្ចការស្របច្បាប់នោះឡើយ។
អាដហុក បានគូសបញ្ជាក់ថា ខ្លួនតែងតែធ្វើសកម្មភាព ដោយអនុលោមតាមច្បាប់ នៅក្នុងរយៈពេលជាង ២០ឆ្នាំនេះ អាដហុកថ្កោលទោសជានិច្ចរាល់សកម្មភាពខុសច្បាប់ ហើយធ្វើការពិភាក្សាជាមួយនឹងអាជ្ញាធរ ខណៈដែលគាំទ្រ និងជួយជនរងគ្រោះ នៃការរំលោភបំពានសិទ្ធិមនុស្ស។
អាដហុក សូមអំពាវនាវដល់ស្ថានទូត ដៃគូអភិវឌ្ឍន៍ សង្គមស៊ីវិល និងអ្នកកាសែត ប្រមូលផ្តុំគ្នា នៅចំពោះមុខតុលាការសាលាដំបូងរាជធានីភ្នំពេញ នៅម៉ោង ៨ និង ៣០ នាទីព្រឹក ថ្ងៃទី២៤ ខែសីហា ឆ្នាំ២០១២ ដើម្បីគាំទ្រលោក ចាន់ សាវ៉េត និងសកម្មជនការពារសិទ្ធិមនុស្សដទៃទៀត៕