ភ្នំពេញ ៖ ចៅក្រមស៊ើបអង្កេតតុលាការរាជធានីភ្នំពេញនៅថ្ងៃទី១៤ ខែសីហា ឆ្នាំ២០១២បានសម្រេចដោះលែងឲ្យមន្ត្រីក្រសួងរៀបចំដែនដីនគរូបនីយកម្មនិងសំណង់ចំនួន៤នាក់បាននៅក្រៅឃុំបណ្ដោះអាសន្ន តែត្រូវបានដាក់ឲ្យស្ថិតក្រោមការត្រួតពិនិត្យតាមផ្លូវតុលាការ។
បុរសឈ្មោះ សារ៉េត បូរ៉ាមី មានឋានៈជាអគ្គនាយករងក្រសួងរៀបចំដែនដីនគរូបនីយកម្ម និងសំណង់, ឈ្មោះ ផូ វុទ្ធី មានឋានៈជាប្រធាននាយកដ្ឋានហិរញ្ញវត្ថុ និង ផែនការ, ឈ្មោះ មាស ឥស្សរ៉ា ជាអនុប្រធាននាយកដ្ឋាន និងឈ្មោះ ទុយ ឡាយ រិទ្ធិ ជាមន្ត្រីត្រូវបានអង្គភាពប្រឆាំងអំពើពុករលួយដឹកនាំដោយលោកឱម យិនទៀង ចាប់ខ្លួនកាលពីថ្ងៃទី៦ ខែសីហា ឆ្នាំ២០១២ ហើយបានបញ្ជូនមកតុលាការរាជធានីភ្នំពេញនៅថ្ងៃទី៨ ខែសីហា ដើម្បីសាកសួរពាក់ព័ន្ធទៅនឹងការកេងយកផលប្រយោជន៍ដោយខុសច្បាប់ពីគម្រោងស្ថាបនាលំនៅដ្ឋានលើដីសម្បទានសង្គមកិច្ចរបស់រដ្ឋាភិបាលសម្រាប់ផ្ដល់ជូនឲ្យអតីតគ្រួសារ យុទ្ធជនពលីពិការ តាមរូបភពកាត់យកភាគរយលលើតម្លៃពិតរបស់គម្រោងសាងសង់ប្រមាណ២៥ភាគរយដែលមានទឹកប្រាក់បាត់បង់ជិត២លានដុល្លារក្នុងគម្រោងជាង៨លានដុល្លារដែលរដ្ឋាភិបាលត្រូវបានចំណាយ។
ក្រោយការសាកសួរក្រុមមន្ត្រីជាប់សង្ស័យទាំង៤នាក់ខាងលើនេះ ត្រូវបានព្រះរាជអាជ្ញាធរអមតុលាការសម្រេចចោទប្រកាន់ពីបទការកេងយកផលប្រយោជន៍ដោយខុសច្បាប់តាមមាត្រា៥៩៧មាត្រា មាត្រា៥៩៨ នៃក្រមព្រហ្មដែលមានចែងនៅក្នុងកថាភាគទី៤ ហើយតាមមាត្រា៥៩៨ក្នុងករណីដែលតុលាការរកឃើញថាជនជាប់ចោទបានប្រព្រឹត្តិការកេងយកផលប្រយោជន៍ដោយខុសច្បាប់នោះជនត្រូវចោទត្រូវប្រឈមមុខជាប់ពន្ធនាគារពី២-៥ឆ្នាំ និង ពិន័យជាប្រាក់ពី៤-១០លានរៀល។ បន្ទាប់មកជនជាប់ចោទត្រូវបានចៅក្រមស៊ើបសួរគឺលោកលាង សំណាត់ បានសម្រេចចេញដីកាឃុំខ្លួនជាបណ្ដោះអាសន្ននៅពន្ធនាគារព្រៃស។
នៅថ្ងៃទី១១និង១៣ ខែសីហា ដោយផ្អែកលើការចោទប្រកាន់របស់ព្រះរាជអាជ្ញាមកលើកូនក្ដីរបស់ខ្លួនជាមជ្ឈិម មេធាវី ការពារក្ដីផ្លូវច្បាប់ឲ្យមន្ត្រីក្រសួងរៀបចំដែនដីនគរូបនីយកម្ម និងសំណង់ទាំង៤នាក់បានដាក់ពាក្យស្នើសុំមកតុលាការជាបន្តបន្ទាប់សុំឲ្យកុនក្ដីរបស់ខ្លួនបាននៅក្រៅឃុំជាបណ្ដោះអាសន្នដោយយល់ព្រមគោរពតាមលក្ខខណ្ឌផ្លូវច្បាប់មួយចំនួនដែលកំពុងអនុវត្តជាធរមាន។ ដោយសំអាងថា កូនក្ដីមានលំនៅដ្ឋានពិតប្រាកដ មានមុខរបរត្រឹមត្រូវ និង ការធានារបស់ក្រុមគ្រួសារ។
សំអាងលើការស្នើសុំរបស់មេធាវីការពារក្ដីជនជាប់ចោទនោះ ការចោទប្រកាន់លើជនជាប់ចោទជាបទមជ្ឈិម លោក លាង សំណាត់ ចៅក្រមស៊ើបសួរក្នុងរឿងក្ដីនេះបានសម្រេចចេញដីកាឲ្យជនត្រូវចោទ៤នាក់ខាងលើបាននៅក្រៅឃុំជាបណ្ដោះអាសន្ន ប៉ុន្តែត្រូវដាក់ឲ្យស្ថិតក្រោមការត្រួតពិនិត្យតាមផ្លូវតុលាការដោយមានភ្ជាប់នូវលក្ខខណ្ឌមួយចំនួនដូចជាមិនត្រូវផ្លាស់ប្ដូរទីលំនៅ ត្រូវបង្ហាញមុខគ្រប់ពេលវេលាតាមការកោះហៅរបស់តុលាការ និង នៅប៉ុស្ដិ៍នគរបាលរដ្ឋបាលមិនត្រូវចាកចេញទៅក្រៅប្រទេស។ល៕
មករា