ភ្នំពេញ ៖ បន្ទាប់ពីតំបន់និងខេត្តខ្លះកំពុងជួបគ្រោះរាំងស្ងួតដោយសារបរិមាណទឹកភ្លៀងធ្លាក់មានចំនួនតិចមិនអាចស្រោចស្រព្វគ្រប់តំរូវការស្រោចស្រពស្រែស្រូវរបស់ប្រជាកសិករលោក លឹម គានហោ រដ្ឋមន្ដ្រីក្រសួងធនធានទឹក និងឧតុនិយមបានចុះពិនិត្យនិងដឹកនាំនិងបញ្ជាផ្ទាល់ទៅមន្ដ្រី ប្រធានមន្ទីរធនធនទឹកនៅតាមបណ្ដាដូចជាខេត្ដព្រះវិហារ កំពត បាត់ដំបង កណ្តាលកំពង់ស្ពឺ ពោធិ៍សាត់ និងខេត្តមួយចំនួនទៀតដែលកំពុងខ្វះទឹក ស្រោចស្រង់ដីស្រែ ដាំដុះ របស់ប្រជាកសិករ ធ្វើយ៉ាងណាអន្តរាគមន៍ជួយបូបទឹកបញ្ចូលស្រែប្រជាពលរដ្ឋ។
លោក ចាន់ យុត្ថា អ្នកនាំពាក្យក្រសួងធនធានទឹកនិងឧត្តុនិយមបានឲ្យដឹងថា តាបបទបញ្ជានិងចំណាត់ការបស់លោករដ្ឋមន្ត្រី និងប្រធានមន្ទីរធនធានទឹកនិងថ្នាក់ដឹងនាំក្រសួងមានរដ្ឋលេខាធិកា អនុលេខាធិកា អគ្គនាយកទាំងអស់ត្រូវចុះទៅតាមគោលដៅនិមួយៗដែលកំពុងជួបបញ្ហាខ្វះទឹក ធ្វើយ៉ាងណានាំទឹកជួយសង្គ្រោះស្រូវរបស់ប្រជាកសិករឲ្យបានទាន់ពេល លើកលែងតែតំបន់ណាគ្មានប្រភពទឹកទៅដល់តែប៉ុណ្ណោះ។
ប្រធានមន្ទីរធនធាន ទឹកនិងឧតុនិយមខេត្ដព្រះវិហារ លោក ចាប កុយ បានឱ្យដឹងថា រហូតមកដល់ថ្ងៃទី១៤ ខែសីហា ឆ្នាំ២០១២នេះ ផ្ទៃដីដាំដុះចំនួន៣៥០ហិកតា ត្រូវបានជួយសង្គ្រោះ ក្នុងនោះនៅស្រុកជាំក្សាន ចំនួន១៣០ហិកតា ស្រុកគូលែន ១០៥ហិកតា និងស្រុកជ័យសែន ១១៥ហិកតា ។
លោកបន្ដថា ក្រោយពីប្រជាកសិករ ជួបគ្រោះរាំងស្ងួត ដោយសារតែកម្រិតទឹកភ្លៀង ដើម្បីស្រោចស្រពដីស្រែរបស់ពួកគាត់នោះ ក្រសួងធនធានទឹក ដឹកនាំដោយលោក តន់ វ៉ាន់ត្ថា រដ្ឋលេខាធិការក្រសួងធនធានទឹក និងលោក ម៉ី លីហួត អគ្គនាយករង រួមជាមួយមន្ទីរ ធនធានទឹកខេត្ដព្រះវិហារ បានចុះទៅមកបូមទឹកដាក់ស្រែជូនប្រជាកសិករ នៅតាមបណ្ដាស្រុក ដូចបានរៀបរាប់ខាងលើ ។មន្ត្រីរូបនោះបញ្ជាក់ផ្ទៃដីកសិកម្មជាង៥០០ហិកតា បាននិងកំពុងខ្វះខាតទឹកធ្វើស្រែ ប៉ុន្ដែខាងក្រសួងធនធានទឹក បាននឹងកំពុងជួយអន្ដរាគមន៍ជាបន្ដបន្ទាប់។
ខេត្ដកំពតទឹក លោក ចាន់ វណ្ណា ប្រធានមន្ទីរធនធាន បានថ្លែងឱ្យដឹងថា ផ្ទៃដីកសិកម្ម ដែលរងផលប៉ះពាល់ដោយ សារគ្រោះរាំងស្ងួតមានជាង២៩០០ហិកតា។មន្ទីរនិង ក្រសួងធនធានទឹក បាននិងកំពុងជួយអន្ដរាគមន៍ តាមរយៈការបូមទឹកដាក់ ស្រែជូនប្រជាកសិករ និងការបើក ប្រព័ន្ធធានាសាស្ដ្រនៅតាមបណ្ដាស្រុក ដើម្បីឱ្យកសិករមានទឹកប្រើប្រាស់ ។ផ្ទៃដីកសិកម្មជិត១ម៉ឺនហិកតា ត្រូវបានជួយសង្គ្រោះ ហើយស្រុកដែលជួបបញ្ហា ច្រើនជាងគេគឺស្រុកបន្ទាយមាស។
ខេត្ដបាត់ដំបងស្រូវសន្ទូងរបស់ប្រជាពលរដ្ឋបានរងនូវការប៉ះពាល់រហូតដល់១៣.៣៣៥ហិកតា ដែលជំរុញឱ្យមានកិច្ចខិតខំប្រឹងប្រែង របស់មន្ដ្រីធនធានទឹកសហការជាមួយអាជ្ញាធរ ប្រជាពលរដ្ឋ ធ្វើយ៉ាងណាស្វែងរកប្រភពទឹកដើម្បីសង្គ្រោះស្រូវសន្ទូងទាំងនោះជូនប្រជាកសិករ។លោកឡុងផលគុណ ប្រធានមន្ទីរធនធានទឹកនិងឧតុនិយមខេត្ដ និយាយថាពេលនេះក្រុមការងាររបស់មន្ទីរ មានវត្ដមានចុះបូមទឹកសង្គ្រោះស្រូវសន្ទូងរបស់ប្រជាពលរដ្ឋនៅក្នុងស្រុកឯកភ្នំខេត្ដបាត់ដំបង ។
លោក បន្ដ ថា ជាលទ្ធផលការចុះអន្ដរាគមន៍បូមទឹកសង្គ្រោះស្រូវសន្ទូងរបស់ប្រជាកសិករតាមការណែនាំរបស់លោករដ្ឋមន្ដ្រីគឺក្រុមការងាររបស់មន្ទីរធនធានទឹកខេត្ដបានជួយបូមទឹកនៅក្នុងឃុំ ព្រែកនរិន្ទ ស្រុកឯកភ្នំ បានចំនួន ៥១០ហិកតា ដែលប្រើប្រាស់ម៉ាស៊ីនបូមទឹកមានការឧបត្ថម្ភផ្ទាល់ពីលោករដ្ឋមន្ដ្រីកន្លងមកជូនអ្នកស្រុកឯកភ្នំ នោះ ។ ក្រៅពីការចុះ ជួយអន្ដរាគមន៍បូមទឹកនៅក្នុងស្រុកឯកភ្នំ ក្រុមការងាររបស់លោកក៏បានអន្ដរាគមន៍បូមទឹកចេញពីចំណុចស្ថានីយ៍ ឫស្សីក្រាំង ស្ថិតក្នុងឃុំឫស្សីក្រាំង ស្រុកមោងឫស្សី ព្រំប្រទល់ស្រុកបាកាន ខេត្ដពោធិ៍សាត់ ដើម្បីចែកជូនដល់ដីស្រែសម្រាប់សង្គ្រោះស្រូវសន្ទូងប្រជាកសិករ ។
លោកឡុង ផលគុណ បានបញ្ជាក់ថា ជាគោលការណ៍ និងជាបទបញ្ជារបស់លោករដ្ឋមន្ដ្រី គឺជំរុញឱ្យមន្ដ្រីក្រុម ការងាររបស់មន្ទីរត្រូវតែមានសកម្មភាពជាប្រចាំ ស្វះស្វែងរកប្រភពទឹក ស្ដាប្រឡាយ បូមទឹក និងពិនិត្យសិក្សាពីផលប៉ះពាល់ទៅលើស្រូវសន្ទូង ឬដីបង្កបង្កើនផលរបស់ប្រជាកសិករ ស្របពេលដែលគ្រឿងចក្រនិង ម៉ាស៊ីនបូមទឹករបស់មន្ទីរដែលមានស្រាប់ ត្រូវតែបំពេញកាតព្វកិច្ច តួនាទី គ្រប់បែបយ៉ាង ដើម្បីបម្រើឱ្យផលប្រយោជន៍សង្គមនិងប្រជាពលរដ្ឋ តាមទិសដៅគោលនយោបាយរបស់រាជរដ្ឋាភិបាល ដែលមានសម្ដេចតេជោ ជាប្រមុខដឹកនាំ ប្រកបដោយការអភិវឌ្ឍន៍លើគ្រប់វិស័យនោះ។
មន្ត្រីក្រសួងធនធានទឹកនិងឧត្តុនិយមបានឲ្យដឹងថានៅឯខេត្តកំពង់ស្ពឺតាកែវនិងខេត្តកណ្តាលក៏ទទួលដំណាំស្រូវរបស់ប្រជាពលរដ្ផជាច្រើនក៏កំពុងជួបគ្រោះរាំងស្ងួតជាមួយគ្នានេះមន្ត្រីជំនាញនៃក្រសួងធនធានទឹកនិងឧត្តុនិយមបាននិងកំពុងសស្រាកស្រសាំចុះជួយបូបទឹកសង្គ្រោះស្រូវរបស់ប្រជាពលរដ្ផ។ជាមួយគ្នានេះលោករដ្ឋមន្ដ្រីក្រសួងធនធានទឹកនិងឧតុនិយមបានចេញនូវការណែនាំតម្រូវឱ្យក្រុមការងាររបស់ក្រសួងក៏ដូចជាអង្គភាពមន្ទីរធនធានទឹកខេត្ដ-រាជធានីទទួលខុសត្រូវចុះអន្ដរាគមន៍ប្រើប្រាស់ម៉ាស៊ីន បូមទឹក គ្រឿងចក្រស្វែងរកប្រភពទឹកជួយដល់ការបង្កបង្កើនផលរបស់ប្រជាកសិករ៕
ឌួងវិរៈជ័យ