ភ្នំពេញ ៖ ខេត្តកំពតត្រូវបានក្រសួងបរិស្ថានជ្រើសរើសជាខេត្ត សម្រាប់ការអនុវត្តលើការគ្រប់គ្រងសំណល់រឹងតាមវិធីសាស្ត្រចម្រុះគំរូមួយ ហើយត្រូវបានផ្សព្វផ្សាយនៅក្នុងសិក្ខាសាលាស្តីពីផែនការគ្រប់គ្រងសំណល់រឹងតាមវិធីសាស្ត្រចម្រុះខេត្តកំពតនៅសណ្ឋាគារសាន់វ៉េ កាលពីព្រឹកថ្ងៃទី១៤ ខែសីហា ឆ្នាំ២០១២។
លោកសូត យា អភិបាលរងខេត្តកំពតបានមានប្រសាសន៍ឲ្យដឹងនៅក្នុងសិក្ខាសាលា នេះថា ចំណុចសំខាន់ដែលក្រសួងបរិស្ថានជ្រើសរើសយកខេត្តកំពត ជាខេត្តសម្រាប់អនុវត្តលើការគ្រប់គ្រងសំណល់រឹងតាមវិធីសាស្ត្រចម្រុះគំរូមួយ ដោយពិនិត្យឃើញថា ទីមួយខេត្តកំពតមានសក្តានុពលច្រើនខាងវិស័យទេសចរណ៍ កំពង់ផែ វិស័យអគ្គិសនី វិស័យអំបិល ជាដើម ។ តាមគម្រោងផែនការសកម្មភាពជ្រើសជាខេត្តគំរូលើការអនុវត្តការគ្រប់គ្រងសំណល់រឹងតាមវិធីសាស្ត្រចម្រុះ ទី១-គឺការគ្រប់គ្រងសំណល់រឹងនៅទីលានចាក់សំរាមប្រកបដោយសុវត្ថិភាពបរិស្ថាន ទី២-ការគ្រប់គ្រងសំណល់មន្ទីរពេទ្យ មណ្ឌលសុខភាព និងគ្លីនិចដោយសុវត្ថិភាពបរិស្ថាន ទី៣-ការគ្រប់គ្រងសំណល់ឧស្សាហកម្ម និងសិប្បកម្មប្រកបដោយសុវត្ថិភាពបរិស្ថាន ទី៤-ការគ្រប់គ្រងសំណល់បរិក្ខារអេឡិចត្រូនិច និងសំណល់គ្រោះថ្នាក់ផ្សេងទៀតនៅក្រុងកំពតប្រកបដោយសុវត្ថិភាពបរិស្ថានទី៥-ការ រៀប ចំទីក្រុងបៃតង និងទី៦-ការរៀបចំ និងការអនុវត្តន៍យន្តការត្រួតពិនិត្យការគ្រប់គ្រងសំណល់តាមវិធីសាស្ត្រចម្រុះ ។ គម្រោងទាំងនេះតម្រូវឲ្យធនធានថវិកាប្រមាណជាង៥០០.០០០ដុល្លារអាមេរិកសម្រាប់ខេត្តកំពត ក្រុងកំពត និងមន្ទីរបរិស្ថានខេត្តកំពតអនុវត្តរយៈពេល៣ឆ្នាំ (២០១៣-២០១៥) ។ លោកបានបញ្ជាក់ថា គម្រោងទាំងអស់នេះជាសំខាន់ គឺការអប់រំប្រជាពលរដ្ឋ នៅក្នុងខេត្តទាំងមូល ធ្វើយ៉ាងណាឲ្យគាត់យល់ដឹងអំពីបញ្ហាសំរាម និងការទុកដាក់សំរាម ទន្ទឹមនឹងនេះចលនាប្រជាពលរដ្ឋតាមរយៈជំរុញធ្វើជីកំប៉ុសពីសំរាម ដើម្បីកាត់បន្ថយអត្រានៃការប្រើប្រាស់ជីគីមីនៅឆ្នាំ២០២០ខាងមុខ ដោយសហប្រតិបត្តិការជាមួយអង្គការនានាជាដៃគូ ឲ្យជួយប្រជាជនផលិតជាជីកំប៉ុសពីសំរាមឲ្យបានគ្រប់ក្រុមគ្រួសារ ។ លោកបន្តថា នៅខេត្តកំពតបច្ចុប្បន្នសំរាមដែលជាសំណល់ពីការប្រើប្រាស់របស់ប្រជាពលរដ្ឋមានចំនួន២៣តោនក្នុងមួយថ្ងៃៗ ដែលរួមចំណែកកសាងជីកំប៉ុសបំរើឲ្យវិស័យសេដ្ឋកិច្ច មួយចំណែកធំដែលឆ្លើយតបទៅនឹងគោលការណ៍របស់រាជរដ្ឋាភិបាលកម្ពុជាផងដែរ។ លោកជឿជាក់ថាការអនុវត្តផែនការគ្រប់គ្រងសំណល់រឹងនេះ នឹងផ្តល់ប្រយោជន៍សំខាន់ណាស់ ចំពោះខេត្តកំពតទាំងមូល ដោយឡែកនៅក្រុងកំពតប្រជាជននឹងទទួលផលច្រើនរស់នៅប្រកបដោយផាសុកភាព បរិស្ថានល្អ ពិសេសបានរួមចំណែកធ្វើឲ្យទីក្រុងស្អាត ដែលនេះជាយុទ្ធសាស្ត្រដ៏ល្អ ធ្វើយ៉ាងណាឲ្យប្រជាជនយល់បានកាន់តែច្រើនអំពីការការពារបរិស្ថាន ពិសេសការបែងចែកសំណល់រឹង និងសំណល់រាវ ដែលលោកសូមថ្លែងអំណរគុណផងដែរ ដល់ក្រសួងបរិស្ថាន និងក្រុមហ៊ុនឯកជនដែលបានចុះហត្ថលេខាជាមួយគ្នា ដើម្បីអភិវឌ្ឍន៍គម្រោងធ្វើអាងចម្រោះទឹកកខ្វក់ ក្នុងគម្រោងថវិកាប្រហែល ២០លានដុល្លារអាមេរិកក្នុងរយៈពេល(២០១២-២០១៥) ដែលបច្ចុប្បន្នគម្រោងនេះកំពុងចុះសិក្សា ដើម្បីអភិវឌ្ឍន៍ទីក្រុងកំពតឲ្យសក្ដិសមជាទីក្រុងប្រឡងប្រណាំងស្អាតបរិស្ថានល្អ។
លោករដ្ឋលេខាធិការក្រសួងបរិស្ថាន ខៀវ មុត បានរំលឹកដល់ខេត្តកំពតថា ដើម្បីសម្រេចគោលដៅនេះចំណុចសំខាន់ត្រូវចេះអប់រំប្រជាពលរដ្ឋឲ្យយល់អំពីបរិស្ថាន ពិសេសការទុកដាក់សំរាមតាមផ្ទះនីមួយៗ និងខិតខំរកអង្គការនានាដែលមានបទពិសោធន៍កែច្នៃសំរាមធ្វើជាជីកំប៉ុសតាមគ្រួសារសម្រាប់ការដាំដុះដំណាំបន្លែបានទៀត ហើយបរិស្ថានក៏ស្អាត ដែលនេះជាគោលដៅដ៏ល្អឈានទៅកាត់បន្ថយការប្រើប្រាស់ជីគីមីនៅឆ្នាំ២០២០ ដែលអង្គការបរិស្ថានពិភពលោកបានកំណត់៕
សុងយោ