ដោយ ៖ ឡុង សំបូរ ថ្ងៃទី 15 សីហា 2012ម៉ោង 09:53:08
ខេត្តស្ទឹងត្រែង៖ គ្រាប់និងកាកសំណលសល់ពីសម័យសង្គ្រាមចំនួន១១៣១គ្រាប់ ត្រូវបានមជ្ឈមណ្ឌុលជាតិគ្រប់គ្រងកម្លាំងរក្សាសន្តិភាពបោសសំអាតមីន និងកាកសំណល់សង្គ្រាម ការដ្ឋានសង្កាត់ស្រះឫស្សីខេត្តស្ទឹងត្រែង បានរៀបចំពិធីកំទេច ចោលនៅថ្ងៃទី១៤ ខែសីហា ឆ្នាំ២០១២នេះ ក្រោមអធិបតីភាពលោក ប្រាក់ សុខុន រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានអាជ្ញាធរមីនកម្ពុជា លោកម៉ៅ ធនិន អភិបាលរងខេត្តស្ទឹងត្រែង ព្រមទាំងមានការចូលរួមពីសំណាក់ប្រជាពលរដ្ឋ មន្ត្រីរាជការ អ្នកមុខអ្នកការជុំវិញសាលាខេត្ត ដ៏ច្រើនកុះករផងដែរ ។
លោកវរសេនីយ៍ពេជ្រ សម្បត្តិ មេបញ្ជាការរងបោសសំអាតមីន សង្កាត់ស្រះឫស្សី ក្រុងស្ទឹងត្រែងបានបញ្ជាក់ថា គ្រាប់ដែលត្រូវកំទេចនេះ មានប្រភេទគ្រាប់ដែល រាវ រកឃើញពីក្នុងដីមានចំនួន៦១២គ្រាប់ និងគ្រាប់លែងប្រើការចំនួន៥១៩គ្រាប់ ដែល យើងបានរៀបចំលក្ខណៈកំទេចប្រើម៉ាស៊ីនចុច និងកូនសោររវៃទៅតាមបច្ចេកទេស ត្រឹមត្រូវមិនឲ្យកើមានគ្រោះថ្នាក់អ្វីឡើយ ។
លោក ម៉ៅ ធនិន អភិបាលរងខេត្តមានប្រសាសន៍ថា សកម្មភាពកំទេចគ្រាប់ ដែលនៅសេសល់នេះ ពិតជាបង្ហាញឲ្យឃើញពីការយកចិត្តទុកដាក់ ជួយដល់ប្រជា ពលរដ្ឋ ដោយគ្រាប់ទាំងនេះយើងយកបានពីក្នុងដីស្រែចំការ និងដីលំនៅដ្ឋានជាដើម ដូច្នេះផ្ទៃដីទាំងនេះ និងមានសុវត្តិភាពសំរាប់បងប្អូនប្រជាពលរដ្ឋ ប្រកបរបរកសិកម្ម និងរស់នៅមានសុវត្ថិភាព។
លោក លោកប្រាក់ សុខុន រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធាន អាជ្ញាធរមីនកម្ពុជាបានមានប្រសាសន៍ថា សកម្មភាពបោសសំអាតមីន អាជ្ញាធរមីននៅ តែបន្តរុករក ហើយមិនធ្វើឲ្យប្រជាពលរដ្ឋយើង នៅទទួរងគ្រោះពីភាពរាំរៃដោយសារ គ្រាប់ទាំងនេះនោះទៀតទេ ។
ចុងក្រោយលោករដ្ឋមន្ត្រី ប្រតិភូអមនាយករដ្ឋមន្ត្រី និងជាអនុប្រធានអាជ្ញាធរ មីនកម្ពុជាបានមានប្រសាសន៍ សំណូមពរទៅដល់អាជ្ញាធរពាក់ព័ន្ធក្នុងខេត្តទាំងអស់ ត្រូវកំណត់ផែនទីផ្ទៃដី ដែមានគ្រាប់នៅសេសល់ពីសម័យសង្គ្រាម ហើត្រូវយសហការ គ្នាជាមួយក្រុមបោសសំអាតមីនកំណត់គោលដៅ សហប្រតិបត្តិការរុករកជាបន្ត ដើម្បីសម្រេចឲ្យបានតាមផែនការរបស់រាជរដ្ឋាភិបាល និងប្រយោជន៍យកដីបំរើដល់ការងារ បង្កបង្កើនផលជូនប្រជាពលរដ្ឋនៅទូទាំងខេត្តស្ទឹងត្រែង ៕