កំពង់ធំ ៖ កាលពីព្រឹកថ្ងៃទី១៤ ខែសីហា ឆ្នាំ២០១២ នៅអធិការដ្ឋានរដ្ឋបាលព្រៃឈើខាងជើងបឹងទន្លេសាប មានពិធីជួបជុំគ្នារវាងរដ្ឋបាលព្រៃឈើ និងកំលាំងតំបន់ប្រតិបត្តិការសឹករងកំពង់ធំ ចំនួន ២០នាក់ និង ក្រុមនិសិ្សតចំនួន៤នាក់ មកពីរដ្ឋបាលព្រៃឈើកណ្តាល ជួបជុំគ្នា ធ្វើដំណើរចុះទៅ ការពារព្រៃឡង់ ដែលជាព្រៃកំពុងតែត្រូវបានរុករានពីសំណាក់មនុស្សមួយក្រុមបង្កសកម្មភាពកាប់បំផ្លាញ។
លោកអនុសេនីយ៍ឯក អ៊ុន ចាន់ធី នាយសេធិការវីរៈ១ របស់សឹករងខេត្ត ព្រមទាំងលោកខោ សុចិត្រា នាយរងសង្កាត់រដ្ឋបានទំរីង និងលោក តាន់ ផាន់នី ព្រមទាំងនិស្សិត ដោយមានសម្ភារៈប្រើប្រាស់ផ្ទាល់ខ្លួន ក្នុងនោះអធិការរដ្ឋបាលព្រៃឈើបានផ្តល់ម៉ូតូចំនួន ៤ គ្រឿងសំរាប់ឲ្យកងកម្លាំងជិះល្បាតមើលតាមចំណុច និងគោលដៅក្នុងព្រៃឡងនោះផងដែរ ។
លោក វណ្ណ សូផាណ្ណា នាយអធិការដ្ឋានរដ្ឋបាលព្រៃឈើខាងជើងបឹងទន្លេសាប បានធ្វើការផ្តាំផ្ញើរ កងកម្លាំងទាំងអស់សហការគ្នាឲ្យបានល្អ ក្នុងការចុះបំពេញបេសកកម្មនេះ ឲ្យមានការអត់ធ្មត់ យល់យោគគ្នា រវាងកំលាំងសឹករងនិងប្អូនៗនិស្សិត ផ្តល់ព័ត៌មាននិងលទ្ធផលការងារដែលបានអនុវត្ត និងអនុវត្តទៅតាម តួនាទី ក្នុងការចូលរួមសហការការពារព្រៃឈើ កុំឲ្យមានការរានព្រៃឈើបន្តទៀត និងហាមមិនឲ្យកំលាំងទាំងអស់ មានការឃុបឃិតគ្នាជាមួយជនល្មើសកាប់ព្រៃឈើ។ ក្នុងនោះដែរក៏ត្រូវតែមានការសម្របសម្រួលជាមួយ និងប្រជាពលរដ្ឋរកដំណោះស្រាយដោយសន្តិវិធី ហាមប្រើប្រាស់អាវុធ ហាមប្រើអំពើហិង្សា គឺមានការណែនាំដល់ប្រជាពលរដ្ឋឲ្យយល់ដឹងពីផ្លូវច្បាប់ និងបានផ្តល់ថវិកាចំនួន ៤០ម៉ឺនរៀលទៀតផង។
លោក វណ្ណ សូផាណ្ណា បានបន្តការផ្តាំផ្ញើដល់កងកំលាំងក៏ដូចជារដ្ឋបាលព្រៃឈើ ឲ្យមានការពិនិត្យស្ថានភាពជាក់ស្តែងពីលំនៅដ្ឋានរបស់បងប្អូនប្រជាពលរដ្ឋ ដែលមានជីវភាពខ្សត់ខ្សោយ មានដីហើយនិងពុំមានលទ្ធភាពក្នុងការសាងសង់ផ្ទះ ព្រោះពុំមានឈើសំរាប់សង់លំនៅដ្ឋាន គឺយោងតាមអនុសាសន៍របស់ ប្រមុខរាជរដ្ឋាភិបាល មិនឲ្យបងប្អូនប្រជាពលរដ្ឋណា រស់នៅយ៉ាងលំបាកវេទនា ក្រោមដំណក់ទឹកភ្លៀងនោះទេ គឺត្រូវតែដោះស្រាយជូនបងប្អូនប្រជាពលរដ្ឋ ឲ្យសុំការអនុញ្ញាត ដោយបំពេញសំណុំបែបបទមករដ្ឋបាលព្រៃឈើ នឹងត្រូវបានដោះស្រាយតាមស្ថានភាពជាក់ស្តែង។
ចំណែកនិស្សិតដែលបានចុះទៅជាមួយរដ្ឋបាលព្រៃឈើ ត្រូវយកចិត្តទុកដាក់ កត់ត្រាទីតាំងព្រៃដែលមាន ស្ថានភាពរិចរិល ព្រៃដែលត្រូវបានរុករាន និងព្រៃដែលប៉ះពាល់ ព្រមទាំងសកម្មភាពយុទ្ធនាការទាំងអស់មក អធិការដ្ឋានរដ្ឋបាលព្រៃឈើ ដើម្បីថ្នាក់លើធ្វើរបាយការណ៍ជូនទៅក្រសួងបន្តទៀត៕
ប៊ុន រដ្ឋា