ភ្នំពេញ ៖ ជាថ្មីម្តងទៀត សម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាបានអំពាវនាវអោយយុវជនទាំងអស់ ត្រូវនាំគ្នាទៅចុះឈ្មោះ និងពិនិត្យបញ្ជីឈ្មោះបោះឆ្នោតអោយបានគ្រប់ៗគ្នា ដើម្បីបំពេញកាតព្វកិច្ចជាប្រជាពលរដ្ឋខ្មែរ។
ថ្លែងនៅក្នុងពិធីចែកសញ្ញាបត្រដល់និស្សិតបញ្ចប់ការសិក្សានៅសាកល វិទ្យាល័យបៀលប្រាយ នៅមជ្ឈមណ្ឌលសនិ្នបាត និងពិពរណ៌កោះពេជ្រ សម្តេចតេជោបានស្នើអោយយុវជន ដែលគ្រប់អាយុបោះឆ្នោត ត្រូវចុះឈ្មោះតែមួយកន្លែងបានហើយ ដើម្បីងាយស្រួលទៅបោះឆ្នោត និងដើម្បីកុំអោយមានឈ្មោះស្ទួន។
លោកទេព នីថា អគ្គលេខាធិការ នៃគណៈកម្មាធិការជាតិរៀបចំការបោះឆ្នោត បានបញ្ជាក់ថា ការពិនិត្យបញ្ជីឈ្មោះ និងចុះឈ្មោះបោះឆ្នោត ត្រូវធ្វើឡើងរៀងរាល់ឆ្នាំ ដោយចាប់ផ្តើមពីថ្ងៃទី០១ ខែកញ្ញា និងបញ្ចប់នៅថ្ងៃនៅថ្ងៃទី១២ ខែតុលា ឆ្នាំ២០១២ខាងមុខនេះ៕