ដោយ ៖ សុខ ខេមរា ថ្ងៃទី 15 សីហា 2012ម៉ោង 09:35:24
ខេត្ដឧត្ដរមានជ័យ-ព្រៃវែង ៖ ក្រុមការងាររបស់មន្ដ្រីមន្ទីរធនធានទឹកខេត្ដឧត្ដរមានជ័យកំពុងមមារ ញឹកចុះអន្ដរាគមន៍បូមទឹកសង្គ្រោះស្រូវ សន្ទូង សំណាប របស់ប្រជាកសិករស្របពេលដែលពុំមានធ្លាក់ទឹកភ្លៀង ក៏ដូចជាគោលការណែនាំរបស់លោករដ្ឋមន្ដ្រី ក្រសួងធនធានទឹក និងឧតុនិយម ឱ្យថ្នាក់ដឹកនាំមន្ដ្រីជំនាញ ក្រុមការងាររបស់ក្រសួងយកចិត្ដទុកដាក់ ខ្ពស់លើការស្វែងរកប្រភពទឹកសម្រាប់សង្គ្រោះស្រូវរបស់ប្រជាកសិករនោះ ។
លោក ឃិន ញ៉ាណ ប្រធានមន្ទីរធនធានទឹកនិងឧតុនិយមខេត្ដឧត្ដរមានជ័យបានឱ្យដឹងថា ការចុះអន្ដរាគមន៍បូមទឹកសង្គ្រោះស្រូវដើមរដូច ឆ្នាំ២០១២ បានធ្វើឡើងនៅភូមិគោករាំង ឃុំជើងទាន ស្រុកចុងកាល់ ដែលមានប្រភពទឹកអូរហើយមានលទ្ធភាពបូមសង្គ្រោះបានទៅលើស្រែ ប្រជាកសិករចំនួន១០០ហិកតា ។ លោក ឃិន ញ៉ាណ បន្ដថា កាលពីថ្ងៃទី១៤ ខែសីហា ឆ្នាំ២១០១២ ខាងមន្ទីរនិងក្រុមការងារបានចុះអន្ដរាគមន៍បូមទឹកសង្គ្រោះស្រូវបានចំនួន ៣០ហិកតា ដែលមានការចូលរួមផងដែរ ពីអាជ្ញាធរក៏ដូចជាប្រជាពលរដ្ឋ រហូតដល់ជាលទ្ធផលការចុះអន្ដរាគមន៍បូមទឹកសង្គ្រោះស្រូវនេះ គិតចាប់ពីថ្ងៃទី៤ ខែកក្កដា ដល់ថ្ងៃទី១៤ ខែសីហា ក្រុមការងារសង្គ្រោះស្រូវជូនប្រជាកសិករបានចំនួន ១១៨៦ហិកតា ក្នុងស្រុកចំនួន៣ ដូចជានៅស្រុកសំរោង ស្រុកចុងកាល់ និងស្រុកបន្ទាយអំពិល ។
ដោយឡែកនៅខេត្ដព្រៃវែង លោក ជុំ សុភី ប្រធានមន្ទីរធនធានទឹកនិងឧតុនិយមបានឱ្យនគរវត្ដដឹងតាមទូរស័ព្ទថា ដោយស្ថានភាពនៅខេត្ដព្រៃវែង ប្រឈមមុខនឹងការខ្វះប្រភពទឹក បើទោះជាក្រុមការងារមានគ្រឿងចក្រ ម៉ាស៊ីនបូមទឹក ក៏ពុំអាចរកប្រភពទឹកដើម្បីយកទៅសង្គ្រោះ ស្រូវ សន្ទូង ក៏ដូចជាសំណាបរបស់ប្រជាកសិករបាន ។ លោកបន្ដថា មួយរយៈនេះកន្លែងដែលមានប្រភពទឹក ក្រុមការងាររបស់មន្ទីរបានចុះអន្ដរាគមន៍បូមទឹកបានប្រមាណជាង១៥០ហិកតា ដូចជាចុះអន្ដរាគមន៍នៅក្នុងស្រុកបាភ្នំ និងស្រុកស្វាយអន្ទរ ហើយក្រុមការងារបន្ដទៅចុះអន្ដរាគមន៍ បូមទឹកឯស្រុកព្រះស្ដេចបន្ថែមទៀត ក្នុងនោះក៏កំពុងកាយប្រឡាយផងដែរ ដែលមានប្រវែង១០០ម៉ែត្រ ដើម្បីជួយសង្គ្រោះសន្ទូង៕