នាយក , នាយករងនៃសាលាបឋមសិក្សានៅទូទាំងស្រុកស្វាយចេក បានចូលរួមជាសិក្ខាកាមក្នុងវគ្គបំប៉ន សាលារៀនមានសុវត្ថិភាពដែលមានរយៈពេល ចាប់ពីថ្ងៃទី ១៣ ដល់ថ្ងៃទី ១៧ ខែ សីហា ឆ្នាំ២០១២ ក្រោមកិច្ចរៀបចំឡើងដោយអង្គការកម្ពុជានៃក្ដីសង្ឃឹម CHO ។
លោក អ៊ិន ជំនោរ ប្រធាន CHO បានអោយដឹងថា: ពិធីបើកវគ្គបំប៉នកម្មវិធីសាលារៀនមានសុវត្ថិភាពដែលមានរយៈពេលចាប់ពីថ្ងៃទី ១៣ ដល់ថ្ងៃទី ១៧ ខែ សីហា ឆ្នាំ២០១២ គោលបំណងចង់បាននិងចង់ឃើញសហគមន៍ មានជីវភាពសមរម្យ មានសុខភាពល្អ មានសន្តិសុខ សុវត្ថិភាពទាំងផ្លូវកាយ ផ្លូវចិត្ត ចង់ឃើញកុមារគ្រប់ៗរូបមានឱកាសទៅទទួលការអប់រំនៅសាលារៀន ។ ជាក់ស្ដែងកម្មវិធីសាលារៀនមានសុវត្ថិភាព នាពេលនោះគោលបំណងធំបំផុតគឺចង់បាននិងចង់ឃើញកុមារគ្រប់ៗរូបបានទទួលការអប់រំដោយស្មើភាព គ្មានការរើសអើង គ្មានអំពើហឹង្សារ ប្រកបដោយគុណភាព ព្រោះកុមារក្នុងពេលនេះពួកគេនិងក្លាយជាធនធានដ៏ចម្បងក្នុងគ្រួសារ សហគមន៍ និងប្រទេសជាតិទៅអនាគត ។
លោក អ៊ិន ជំនោរ ប្រធាន CHO បានបន្តថា: ជំនួសមុខអង្គការកម្ពុជានៃក្ដីសង្ឃឹមនិងក្នុងនាមជាប្រធាន CHO លោកសង្ឃឹមដោយមុតមាំថា: កម្មវិធីសាលារៀនមានសុវត្ថិភាពដែលបើកវគ្គបំប៉នក្នុងពេលនេះ និងពេលបន្ទាប់ទៀតនឹងក្លាយជាលទ្ធផល ជាក់ស្ដែងតាមសាលារៀនដែលជាផលប្រយោជន៍ ដ៏ពិតប្រាកដចំពោះកុមារដោយពិនិត្យឃើញការចូលរួមនិងសហការរបស់ថ្នាក់អប់រំក្នុងខេត្តគ្រប់លំដាប់ថ្នាក់និងលោកអភិបាលស្រុកដែលជាកម្លាំងចលករគាំទ្រ ដ៏មានប្រសិទ្ធភាព មិនអាចខ្វះបានពិសេសលោក គ្រូ អ្នកគ្រូ ដែលជាអ្នកអនុវត្តផ្ទាល់ជាមួយសហគមន៍និងកុមារនៅគ្រប់មូលដ្ឋាន ។
លោក ពិន សេងហាប់ អភិបាលរងស្រុកស្វាយចេក បានមានប្រសាសន៍ថា: កម្មវិធីសាលារៀនមានសុវត្ថិភាព ពិតជាមានសារៈសំខាន់ណាស់ចំពោះការយកចិត្តទុកដាក់ខ្ពស់ទៅលើកុមារពីព្រោះវាផ្ដល់ចំណេះដឹងនិងបទពិសោធន៍ ជាច្រើនសម្រាប់អោយកុមារសិក្សារៀនសូត្រ ពិសេសលោកគ្រូអ្នកគ្រូអាចយកចំណេះដឹងទាំងនេះទៅប្រើប្រាស់ក្នុងការជួយដល់កុមារនៅតាមមូលដ្ឋាន ។
លោក សួង សាវុន អនុប្រធានមន្ទីរអប់រំយុវជននិងកីឡាខេត្តបន្ទាយមានជ័យបានបញ្ជាក់បន្ថែមទៀតថា: ការបើកវគ្គបំប៉នកម្មវិធីសាលារៀនមានសុវត្ថិភាពពិតជាបានឆ្លើយតបទៅនឹងតម្រូវការដែលសាលារៀននៅមូលដ្ឋានកំពុងតែមានការខ្វះខាតទាំងផ្នែកសមត្ថភាពនិងសម្ភារៈប្រើប្រាស់ ។ ជាក់ស្ដែងវគ្គបំប៉ននេះបានជំរុញអោយវិស័យសិក្សាធិការនៅមូលដ្ឋាន មានភាពរឹងមាំនិងប្រកបដោយគុណភាព សំដៅកាត់បន្ថយអត្រាបោះបង់ការសិក្សារបស់សិស្សនៅបឋមសិក្សា។ សកម្មភាពទាំងនេះគឺស្របទៅទៅនឹងផែនការរបស់ក្រសួងអប់រំយុវជននិងកីឡាបានកំណត់ក៏ដូចជាគោលនយោបាយយុទ្ធសាស្រ្តចតុកោណរបស់រាជរដ្ឋាភិបាលកម្ពុជា។ លោកបានបន្តផ្ដាំផ្ញើដល់សិក្ខាកាមទាំងអស់ត្រូវមានសារៈសំខាន់សម្រាប់អស់លោកបានពុទ្ធិមួយយកទៅអនុវត្តប្រកបដោយប្រសិទ្ធភាពនិងភាពស័ក្តិសិទ្ធិ ៕