នៅសាលាខេត្តបន្ទាយមានជ័យ បានរៀបចំប្រជុំផ្សព្វផ្សាយ ស្ដីពីការពិនិត្យបញ្ជីឈ្មោះនិងចុះឈ្មោះអ្នកបោះឆ្នោត ជូនតំណាងអភិបាលស្រុក-ក្រុង ក្រុមប្រឹក្សាឃុំសង្កាត់ មេឃុំ-ចៅសង្កាត់ និងស្មៀនឃុំសង្កាត់ ទូទាំងខេត្តសរុបចំនួន ១៣៥ នាក់ ។ ពិធីនេះប្រព្រឹត្តទៅក្រោមការអញ្ជើញចូលរួមពីឯកឧត្តម មាន សទិ សមាជិកគណកម្មាធិ ការជាតិរៀបចំការបោះឆ្នោត ឯកឧត្តម អ៊ុង ម៉ុន សមាជិកក្រុមប្រឹក្សាខេត្តបន្ទាយមានជ័យលោក រៀម សារិន អភិបាលរងខេត្តបន្ទាយមានជ័យ ។
បន្ទាប់ពីលោក ហី គឹមសេង ប្រធានលេខាធិការដ្ឋានខេត្តរៀបចំការបោះឆ្នោត ឡើងធ្វើរបាយការណ៍ស្វាគមន៍ និងរាយការណ៍អំពីការងារលេខាធិការដ្ឋាន ខេត្តរៀបចំការបោះឆ្នោតបានអនុវត្តន៍ សំរេចបានក្នុងរយៈ ពេលនៃ ការបោះឆ្នោតជ្រើសតាំងក្រុមប្រឹក្សាឃុំ-សង្កាត់ អាណត្តិទី៣រួចមក ។
ឯកឧត្តម មាន សទិ សមាជិកគណៈកម្មាធិការរៀបចំការបោះឆ្នោត មានប្រសាសន៍ថា ទិសដៅដែលគណៈកម្មាធិការជាតិរៀបចំការបោះឆ្នោតធ្វើការផ្សព្វផ្សាយដល់អស់លោក លោកស្រី ជាអភិបាលស្រុក-ក្រុង មេឃុំ-ចៅសង្កាត់ និងស្មៀនឃុំសង្កាត់ នាពេលនេះគឺជាការផ្សព្វផ្សាយនូវគោលការណ៍ទូទៅនៃការរៀបចំធ្វើការពិនិត្យបញ្ជីឈ្មោះ និងចុះឈ្មោះអ្នកបោះឆ្នោតដើម្បីផ្ដល់នូវបច្ចេកទេសសំរាប់ បំពេញការងារអោយបានកាន់តែមានភាពល្អប្រសើរ និងអនុវត្តន៍បានត្រឹមត្រូវតាមនីតិវិធីដែលគណៈកម្មាធិការរៀបចំការបោះឆ្នោតជាតិបានកំណត់ ។ឯកឧត្តម បានបន្តបញ្ជាក់ឡើងវិញផងដែរ អំពីផ្ដើមបង្កើតបញ្ជីឈ្មោះបោះឆ្នោត និងប្រវត្តិដើមកំណើតដំបូងនៃការបោះឆ្នោត នៅក្នុងប្រទេសកម្ពុជា វិធីសាស្រ្តនៃការវាយតំលៃលើបញ្ជីបោះឆ្នោតដែលសកលលោកកំពុងតែអនុវត្តន៍និង របៀបវាយតំលៃលើបញ្ជីបោះឆ្នោត តួនាទីនិងការងារចំពោះមុខរបស់ក្រុមប្រឹក្សា ឃុំ សង្កាត់ ដែល នឹងត្រូវអនុវត្តន៍ក្នុងការចុះឈ្មោះបោះឆ្នោត និងពិនិត្យបញ្ជីឈ្មោះបោះឆ្នោតនាពេលខាងមុខ វិធីនៃការកែប្រែលើឈ្មោះសួនក្នុងបញ្ជីឈ្មោះបោះឆ្នោត វិធីសាស្រ្តនៃការផ្សព្វផ្សាយបញ្ជីដំបូង និងការប្រើប្រាស់បញ្ជីបោះឆ្នោតដំបូង វិធីសាស្រ្តនៃការប្រើប្រាស់ វិធីបញ្ជាក់ពីអត្តសញ្ញា សំរាប់ធ្វើការចុះឈ្មោះ និងការបោះឆ្នោត ព្រមទាំងវិធីសាស្រ្តសំរាប់ដោះស្រាយបញ្ហានិងបណ្ដឹងផ្សេងៗ ដែលក្រុមប្រឹក្សា ឃុំ-សង្កាត់ និងស្មៀនត្រូវធ្វើការដោះស្រាយនៅពេលចុះឈ្មោះបោះឆ្នោត។ ឯកឧត្តមបានសំណូមពរដល់គណៈអភិបាលខេត្ត-ស្រុក-ក្រុង ទាំងអស់ជួយត្រួតពិនិត្យជាមួយស្មៀននិងក្រុមប្រឹក្សា ឃុំ-សង្កាត់ ក្នុងដំណើរការនៃការចុះឈ្មោះបោះឆ្នោត ព្រមទាំងជួយជំរុញអោយប្រជាពលរដ្ឋ អោយមកធ្វើការពិនិត្យឈ្មោះនិងចុះឈ្មោះបោះឆ្នោតអោយបានគ្រប់គ្នាផងដែរ ។លោក រៀម សារិន អភិបាលរង ខេត្តបន្ទាយមានជ័យបាន មានប្រសាសន៍ថ្លែងអំណរ គុណដល់ គណៈកម្មាធិការជាតិ រៀបចំការបោះឆ្នោតដែលបាន ធ្វើការផ្សព្វផ្សាយស្ដីពីការពិនិត្យឈ្មោះនិងចុះឈ្មោះ អ្នកបោះឆ្នោតនាពេលនេះ ដើម្បីមន្រ្តីឃុំ-សង្កាត់ទាំងអស់បានយល់ច្បាស់ពីនីតិវិធីច្បាប់ និងអនុវត្តបានត្រឹមត្រូវ។ ម្យ៉ាងវិញទៀត សូមអោយក្រុមប្រឹក្សា ឃុំ-សង្កាត់និងស្មៀនទាំងអស់យកចំណេះ ដឹងដែលទទួលបាននាពេលនេះ ទៅអនុវត្តន៍អោយបានល្អនៅតាមមូលដ្ឋានរបស់ខ្លួន ៕