ភ្នំពេញ: ក្នុងពិធីចែកសញ្ញាប័ត្រដល់និស្សិតបញ្ចប់ការសិក្សា របស់សាកលវិទ្យាល័យ បៀលប្រាយ នៅកោះពេជ្រ នាព្រឹកថ្ងៃទី១៥ ខែសីហា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានប្រកាសថា បទឧទ្ទេសនាមរបស់សម្តេច ដែលបានបកស្រាយលើបញ្ហាព្រំដែនកម្ពុជា-វៀតណាម នៅរដ្ឋសភា កាលពីថ្ងៃទី៩ ខែសីហា ឆ្នាំ២០១២ រយៈពេលជាង ៥ ម៉ោង នឹងត្រូវបោះពុម្ពជាសៀវភៅ ព្រមទាំងចងក្រងជាខ្សែអាត់ ដើម្បីទុកជាឯកសារ។
សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា "រយៈពេលជាង ៥ ម៉ោងនោះ មិនបានធ្វើឲ្យខ្ញុំអស់កម្លាំង ចុះខ្សោយទេ ប៉ុណ្ណឹងល្មមហើយ តែក៏នៅមានប្រធានបទជាច្រើន ត្រូវនិយាយទេ។ ឥឡូវសៀវភៅក៏ត្រូវចេញ ហើយអា ឌីវីឌី ឬកាសែត ថេបអីនឹង គឺថា តែមានរឿងអី ចាក់អានឹងហើយ។ បោះចេញជាសៀវភៅ ទាំងភាសាខ្មែរ និងទាំងភាសាអង់គ្លេសនូវអត្ថបទឧទ្ទេសនាមនោះ ហើយយកទៅធ្វើជាមូលដ្ឋានទៅ ហើយនាំគ្នាវិភាគទៅ។ ព្រឹត្តិការណ៍វាបានវិវត្តន៍មកអីចឹង។ បើចង់ដឹងថ្ងៃនឹង តើថ្ងៃពីម្សិល វាមានស្អី"។
ជាមួយនឹងប្រសាសន៍ដូច្នេះ សម្តេចនាយករដ្ឋមន្ត្រី ហ៊ុន សែន ក៏បានលើកឡើងថា សម្តេចមិនចង់តមាត់តកជាមួយនឹងក្រុមអ្នកដែលបន្តរិះគន់រដ្ឋាភិបាល ក្នុងរឿងព្រំដែននោះឡើយ។
សម្តេចនាយករដ្ឋមន្ត្រី ហ៊ុន សែន ក៏បានរម្លឹកផងដែរ អំពីប្រសាសន៍របស់សម្តេចនៅក្នុងរដ្ឋសភា ពាក់ព័ន្ធនឹងសារបាន និងដើមទងនៃប្រវត្តិសាស្ត្រព្រំដែនកម្ពុជា និងវៀតណាម ដោយគេមិនអាចច្បិចយកតែមួយកន្លែង មកនិយាយបានទេ។
សូមរម្លឹកថា សម្តេចនាយករដ្ឋមន្ត្រី ហ៊ុន សែន បានចំណាយពេលវេលាជាង ៥ ម៉ោង ដើម្បីពន្យល់បំភ្លឺដល់រដ្ឋសភា អំពីបញ្ហាព្រំដែនដ៏ចម្រូងចម្រាសរវាងកម្ពុជា និងវៀតណាម។
សម្តេចនាយករដ្ឋមន្ត្រី ហ៊ុនសែន បានលើកឡើងថា អ្វីដែលរដ្ឋាភិបាលរបស់សម្តេចបានធ្វើបច្ចុប្បន្ន គឺផ្អែកទៅលើផ្លូវច្បាប់ និងអ្វីដែលបន្សល់ទុកពីសម័យសង្គមរាស្ត្រនិយមរបស់សម្តេចឪ នរោត្តម សីហនុ ប៉ុណ្ណោះ។ សម្តេចនាយករដ្ឋមន្ត្រី ក៏បានប្រកាសធានា ចំពោះមុខរដ្ឋសភា និងចំពោះប្រជាជនកម្ពុជាថា កម្ពុជាមិនមានបាត់បង់ទឹកដី ទាំងដែនគោក ឬដែនសមុទ្រនោះទេ។
ទោះបីជាយ៉ាងនេះក្តី ក្នុងកិច្ចប្រជុំរដ្ឋសភានោះ សម្តេចនាយករដ្ឋមន្ត្រី ហ៊ុនសែន បានលើកឡើងពីភាពចាំបាច់ ដែលត្រូវធ្វើការដោះដូរដីរវាងប្រទេសកម្ពុជា និងវៀតណាម ដោយសារតែផ្អែកទៅលើការកាន់កាប់ស្រាប់របស់ប្រជាជនកម្ពុជា និងវៀតណាម ផ្អែកលើស្ថានភាពកាន់កាប់ជាក់ស្តែង។
ជាមួយនឹងប្រសាសន៍ដូច្នោះ សម្តេចនាយករដ្ឋមន្ត្រី ហ៊ុន សែន ក៏បានរិះគន់ដល់អ្នក ដែលបន្តមិនទទួលស្គាល់ ថ្ងៃ៧មករា ដែលសម្តេចចាត់ទុកថា ជាសច្ចធម៌ប្រវត្តិសាស្ត្រ និងនាំឲ្យមានការអភិវឌ្ឍន៍មកដល់ពេលនេះ៕