បន្ទាយមានជ័យ: កម្លាំងអាវុធហត្ថស្រុកម៉ាឡៃ កាលពីថ្ងៃទី១៨ ខែសីហា ឆ្នាំ២០១២ បានឃាត់ខ្លួនបុរសម្នាក់ ដែលប្រើហិង្សា និងបង្ខាំងកូនប្រុស អាយុ ៩ឆ្នាំ ខណៈគេដើរតាមផ្លូវទៅលេងជីតា។
បុរសឈ្មោះ ម៉ៅ រ៉ន អាយុ ៥៥ឆ្នាំ រស់នៅភូមិខ្លាងាប់ ឃុំទួលពង្រ ស្រុកម៉ាឡៃ រីឯកូនប្រុសឈ្មោះ ម៉ៅ លីហៀង អាយុ ៩ឆ្នាំ។ បុរសនេះបានយកដាវសាមូរ៉ៃភ្ជង់ក មុខ និងយកដាវវាយជាំភ្លៅឆ្វេងរបស់កូន ហើយទុកកូនក្នុងផ្ទះបិទទ្វារជិត។ តែស្ត្រីជាប្រពន្ធបានតាមរក និងស្រែកហៅ ទើបកូននោះលូនឡើងជញ្ជាំងផ្ទះ លោតចុះដីតាមប្រហោង មករកម្តាយវិញ។
ស្ត្រីជាប្រពន្ធឈ្មោះ សៃ សុខ អាយុ ៥០ឆ្នាំ បានឲ្យដឹងថា គាត់ និងជនសង្ស័យ បានគ្នាជាប្តីប្រពន្ធ ២២ឆ្នាំ មកហើយ មានកូនប្រុស ៦នាក់។ ប៉ុន្តែប្តីរូបនេះដែលធ្លាប់ជាប់គុក ៣ឆ្នាំ ពុំកែប្រែទង្វើ និងចិត្តឃោរឃៅនោះទេ នៅតែប្រើអំពើហិង្សាលើប្រពន្ធកូន និងអ្នកភូមិ ជាញឹកញាប់។
លោក អ៊ឹម សាទ មេភូមិខ្លាងាប់ បាននិយាយថា ស្ត្រីជាប្រពន្ធបានធ្លាក់ខ្លួនពិការ ស្គមរីងរៃ ព្រោះប្តីវាយឲ្យស្រាំលលាដ៍ក្បាល និងគ្រេចចង្កេះ។ នៅឆ្នាំ២០១១ ស្ត្រីជាប្រពន្ធ និងកូនៗ បានសម្រេចចុះចេញពីផ្ទះ ទៅនៅផ្ទះមា ដើម្បីគេចផុតពីអំពើហិង្សា ទារុណកម្មផ្លូវកាយ ផ្លូវចិត្ត និងជីវភាព ដែលពុំអាចថ្លាថ្លែងអស់ និងខំលាក់ទុក្ខច្រើនឆ្នាំមកនេះ។
លោក ព្រហ្ម ថេង នាយការិយាល័យស្រាវជ្រាវបទល្មើស អាវុធហត្ថខេត្តបន្ទាយមានជ័យ បានឲ្យដឹងថា ជនសង្ស័យឈ្មោះ ម៉ៅ រ៉ន បានទទួលស្គាល់កំហុស និងវត្ថុតាង (ដាវសាមូរ៉ៃ) របស់ខ្លួន តែបដិសេធការភ្ជង់ និងបង្ខាំងកូនប្រុស។ ព្រោះតែក្តីនឹករលឹក គេចង់តថ្លៃនឹងប្រពន្ធ ឲ្យមករស់នៅជុំគ្រួសារប្តីប្រពន្ធវិញ។
លោក ព្រហ្ម ថេង និយាយបន្តថា បណ្តឹងនេះ ខាងអាវុធហត្ថបានបញ្ជូនសំណុំរឿង ទៅសាលាដំបូងខេត្តបន្ទាយមានជ័យ នៅថ្ងៃទី១៩ ខែសីហាហើយ។ មួយថ្ងៃបន្ទាប់មក តុលាការបានសម្រេចឃុំខ្លួនបុរសឈ្មោះ ម៉ៅ រ៉ន ដែលបានបង្កហិង្សាក្នុងគ្រួសារ ដ៏អាក្រក់ ពុំអាចអត់អោនបាន៕