ខេត្តព្រះវិហារ ៖ អង្ករចំនួន១៨តោន រួមនឹងមីយើងចំនួន៤១០កេស ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងលោកជំទាវ ត្រូវបាននាយឧត្តមសេនីយ៍ គន់ គីម អគ្គមេបញ្ជាការរង និងជានាយសេនាធិការចំរុះនៃកងយោធពលខេមរភូមិន្ទ នាំយកទៅប្រគល់ជូនដល់ដៃគ្រួសារកងទ័ព ស្ថិតនៅអង្គភាពកងពលតូច លេខ៨ទិសប្រាសាទព្រះវិហារ។
មានប្រសាសន៍សំណេះសំណាលនាឱកាសនោះនាយឧត្តមសេនីយ៍ គន់ គីម បានពាំនាំនូវប្រសាសន៍ផ្តាំផ្ញើសាកសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន និងលោកជំទាវកិតិ្តព្រឹទ្ធបណិ្ឌត ជូនចំពោះបងប្អូនគ្រួសារកងទ័ព ទាំងអស់ប្រកបដោយសេចក្តីនឹករលឹក ព្រមទាំងថ្លែងនូវការកោតសរសើរចំពោះទឹកចិត្តលះបង់ប្តីសី កូនជាទីស្រឡាញ់ ឲ្យចូលបំរើក្នុងជួរកងទ័ព ដើម្បីបុព្វហេតុការពារជាតិ មាតុភូមិ ។ ជោគជ័យ និងស្នាដៃធំៗជាច្រើន ដែលវីរៈយុទ្ធជនរបស់យើងសំរេចបាននា ពេលកន្លងមកគឺ ពិតជាមានតំលៃឧត្តុង្គឧត្តមមិនអាចកាត់ថ្លៃបាន ហើយដែលត្រូវប្រជាពលរដ្ឋទូទៅចងចាំ និងដឹងគុណជានិច្ច។
នាយឧត្តមសេនីយ៍ គន់ គីម បានបញ្ជាក់ថា ជាមួយនឹងទឹកចិត្តលះបង់ដ៏ធំធេងនេះ សម្តេចនិងលោកជំទាវ ក៏ដូចជាសប្បុរសជននានា តែងតែបានគិតគូរជានិច្ច អំពីសុខទុក្ខកងទ័ព គ្រួសារកងទ័ពដែលឈរជើងនៅតំបន់ព្រំដែន ដោយនៅរដូវភ្លៀងបានឧបត្ថម្ភអាវភ្លៀង នៅរដូវរងារបានឧបត្ថម្ភអាវរងារ ជាពិសេសគឺការគិតគូរដោះស្រាយស្បៀងអាហារ សម្ភារៈប្រើប្រាស់ និងពូជផលដំណាំផ្សេងៗ ដើម្បីឲ្យបងប្អូនមានលទ្ធភាពគ្រប់គ្រាន់ នៅក្នុងការរកប្រាក់ចំណូលបង្កើនជីវភាពគ្រួសារ ព្រោះថារាល់ការឧបត្ថម្ភម្តងៗ គឺគ្រាន់តែជាការដោះស្រាយបានមួយគ្រាតែប៉ុណ្ណោះ សំខាន់គឺបងប្អូនត្រូវចេះធ្វើការច្នៃប្រឌិត និងខិតខំដោយខ្លួនឯង។
នាយឧត្តមសេនីយ៍ គន់ គីម ក៏បានផ្តាំផ្ញើដល់ប្រជាពលរដ្ឋទាំងអស់ ត្រូវបង្កើនការយកចិត្តទុកដាក់ដល់ការងារបង្កបង្កើនផលឲ្យអស់ផ្ទៃដី ជាពិសេសការថែទាំសុខភាពឲ្យបានល្អ បង្កាបានពីជំងឺឆ្លងផ្សេងៗ ព្រោះរដូវនេះជារដូវភ្លៀង ។ អំណោយដែលត្រូវផ្តល់ជូននាពេលនោះរួមមាន ប្រជាពលរដ្ឋ១.២៣១គ្រួសារដោយក្នុងមួយគ្រួសារទទួលបានអង្ករ១៥គីឡូក្រាម និងមី១០កញ្ចប់៕