ភ្នំពេញ ៖ លោកឧបនាយករដ្ឋមន្ត្រី គាត ឈន់ បានថ្លែង នៅក្នុងអង្គវិបស្សនាប្រចាំឆ្នាំលើកទី៦ នៃកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ នាព្រឹកថ្ងៃទី១៨ សីហា ឆ្នាំ២០១២ នៅមជ្ឈមណ្ឌលសន្និបាតកោះពេជ្រថា កំណែទម្រង់គឺជាការស្លាប់រស់របស់រាជ រដ្ឋាភិបាលកម្ពុជា ហើយត្រូវចាត់ទុកថា កំណទម្រង់គឺជាការងារប្រចាំថ្ងៃរបស់យើង ដើម្បី បន្តកែលម្អពង្រឹង បង្កើននិងពង្រីកសមត្ថភាពលទ្ធភាព និងសក្តានុពលភាពរបស់យើងក្នុង គោលដៅរក្សាឲ្យបានជាមួយនិងការវិវត្តន៍នៃសង្គមសេដ្ឋកិច្ច និងនយោបាយនៅក្នុង ប្រទេស ក្នុងតំបន់ និងពិភពលោក ។
លោកឧបនាយករដ្ឋមន្ត្រីបានបន្តថា នៅក្នុងដំណាក់កាលនីមួយៗនៃការអនុវត្តកម្ម វិធីកែទម្រង់ការគ្រប់គ្រងហិរញ្ញវត្ថុសាធារណៈរយៈពេល៤ឆ្នាំ (ឆ្នាំ២០០៥-២០០៨) ដែលបានកែប្រែស្ថានភាពនៃការអនុវត្តថវិកាពីភាពរ៉ាំរ៉ៃ នៃឱនភាពសាច់ប្រាក់មកជាមានអតិរេកសាច់ប្រាក់ និងពីភាពដែលមិនអាចទូទាត់ និងបើកផ្តល់បានទាន់ពេលវេលា មកអាចព្យាករណ៍បាន និងធានាបានការទូទាត់និងបើកផ្តល់បានទាន់ពេលវេលា ។ ជាក់ស្តែងការព្យាករណ៍ចំណូល និងការគ្រោងចំណាយកាន់តែបានសុក្រឹត្យដែលធ្វើឲ្យការអនុវត្តចំណូល និងចំណាយកាន់តែសម្រេចបានយ៉ាងល្អប្រសើរពីឆ្នាំទៅមួយឆ្នាំ ពោលគឺចំណូលប្រចាំឆ្នាំ ភាគច្រើនសម្រេចបានតាមគោលដៅនៃកំណើន០,៥ ភាគរយនៃផលិតផលសរុបក្នុងស្រុក និងភាគច្រើនតែងតែអនុវត្តបានតាមច្បាប់កំណត់ ហើយក៏មិនដែលលើសឬខ្វះច្រើនជាង ៥ភាគរយនៃច្បាប់កំណត់នោះទេ ។ រីឯការអនុវត្តចំណាយវិញក៏តែងតែត្រូវបានរក្សាឲ្យនៅ ត្រឹមច្បាប់កំណត់ ទោះជាឱនភាពថវិកាសរុបត្រូវបានកើនឡើងដល់ជាង៨ភាគរយនៃ ផលិតផលសរុបក្នុងស្រុកនៅឆ្នាំ២០០៩ និងឆ្នាំ២០១០ ហើយឆ្នាំ២០១១ ធ្លាក់មកនៅត្រឹមប្រ មាណ៧ភាគរយនៃផលិតផលសរុបក្នុងស្រុក និងឆ្នាំ២០១២ និងឆ្នាំ២០១៣ នឹងនៅត្រឹមប្រ មាណ៦ភាគរយនៃផលិតផលសរុបក្នុងស្រុកក៏ដោយ ក៏ចំណាយចរន្តនៅតែត្រូវបានរក្សា ក្នុងកម្រិតត្បិតត្បៀត និងសន្សំសំចៃ ដើម្បីរក្សាអតិរេកចរន្តជានិច្ច ។
លោកឧបនាយករដ្ឋមន្ត្រីបានបញ្ជាក់ថា បទពិសោធន៍ជាអន្តរជាតិព្រមទាំងស្ថានភាពសេដ្ឋកិច្ច និងហិរញ្ញវត្ថុ បច្ចុប្បន្នបានបញ្ជាក់ឲ្យឃើញកាន់តែច្បាស់អំពីសារសំខាន់នៃការពង្រីកការគ្រប់គ្រងហិរញ្ញ វត្ថុសាធារណៈដែលកាន់តែមានទំនាក់ទំនងទៅវិញទៅមកយ៉ាងជិតសិ្នទ្ធទៅនិងហិរញ្ញវត្ថុ ឯកជនជាតិ ហិរញ្ញវត្ថុឯកជនអន្តរជាតិ និងហិរញ្ញវត្ថុសាធារណៈអន្តរជាតិ ។ ការសម្រេច បានលទ្ធផលដ៏ល្អប្រសើរខាងលើនេះគឺពិតជាបានមកដោយសារតែកម្ពុជា មានចក្ខុវិស័យ ច្បាស់លាស់ មានគោលនយោបាយត្រឹមត្រូវ មានយន្តការអប្បមាទជាប្រចាំនិងបានដាក់ ចេញនូវវិធានការប្រកបដោយប្រសិទ្ធភាព និងទាន់ពេលវេលាព្រមទាំងបានធ្វើកំណែទម្រង់ សមស្របលើគ្រប់វិស័យទៀតផង ។ ទោះជាយ៉ាងណាយើងក៏ទទួលស្គាល់ជាប្រព័ន្ធគ្រប់ គ្រងរដ្ឋបាល និងហិរញ្ញវត្ថុសាធារណៈរបស់យើងនៅមានលក្ខណៈវិមជ្ឈការខ្ពស់ និងតម្រូវ ឲ្យមានការបង្កើនតម្លាភាពគណនេយ្យភាព និងប្រសិទ្ធភាពបន្ថែមទៀត ដែលរាជរដ្ឋាភិ បាល បាននិងកំពុងធ្វើការងារនេះយ៉ាងសកម្ម ពិសេសតាមរយៈកំណែទម្រង់៣ ដែលត្រូវ ដើរទន្ទឹមគ្នា និងប្រកបដោយសង្គតិភាពនិងគ្នានោះ គឺកំណែទម្រង់ការគ្រប់គ្រងហិរញ្ញវត្ថុ សាធារណៈ កំណែទម្រង់រដ្ឋបាលសាធារណៈ និងកំណែទម្រង់វិមជ្ឈការ និងវិសហមជ្ឈការ ។ ពិតណាស់ថា យើងមានយន្តការដឹកនាំគ្រប់គ្រងនិងសម្របសម្រួលរវាងកំណែទម្រង់ ទាំង៣រួចហើយ តាមរយៈក្រុមប្រឹក្សាកំណែទម្រង់រដ្ឋ គណកម្មាធិការគោលនយោបាយ សេដ្ឋកិច្ច ហិរញ្ញវត្ថុ គណកម្មាធិការជាតិសម្រាប់ការអភិវឌ្ឍន៍បែបប្រជាធិបតេយ្យនៅថ្នាក់ ក្រោមជាតិ និងគណកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ ដែលមានសមាជិកមកពីគ្រប់ស្ថាប័ន ។
លោកឧបនាយករដ្ឋមន្ត្រីបានជម្រុញលើកទឹកចិត្តឲ្យមានការពិនិត្យ ពិភាក្សាបន្ថែម ទៀតលើការធានាសង្គតិភាព និងការដើរទន្ទឹមគ្នានៃកំណែទម្រង់ទាំង៣នេះ ដើម្បីឲ្យការអនុវត្តប្រកបដោយភាពសក្តិសិទ្ធិ ប្រសិទ្ធភាព និងសម្រេចបានជោគជ័យតាមគោលដៅរៀងៗខ្លួន ក្នុងគោលបំណងឆ្ពោះទៅបង្កើតតម្លាភាពគណនេយ្យភាព ប្រសិទ្ធភាព និងភាពសក្តិសិទ្ធិនៃប្រព័ន្ធគ្រប់គ្រងរដ្ឋបាល និងហិរញ្ញវត្ថុសាធារណៈ ៕
