ភ្នំពេញ ៖ លោក នុត ពុធដារ៉ា ជំនួយការសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជា និងជាអភិបាលនៃគណះអភិបាលខណ្ឌដង្កោ រួមទាំងអភិបាលរងចៅសង្កាត់ កាលពីព្រឹកថ្ងៃទី១៨ ខែសីហា ឆ្នាំ២០១២ បានដឹកនាំមន្ត្រីក្រោមឧិវាទចុះពិនិត្យមើលស្ថានីយបូមទឹករបស់សម្តេចតេជោ ហ៊ុន សែន ទី៣៩ ដែលកំពុងមមាញឹកក្នុងការបូមទឹកចេញពីបឹង និងទន្លេដើម្បីបង្ហូទៅតាមប្រឡាយនានា ក្នុងគោលបំណងឲ្យពលរដ្ឋបូមទឹកទាំងនោះបន្តចូលស្រែពួកគាត់កំពុងជួបគ្រោះរាំងស្ងួតគ្មាន។
លោក អែម ឆែម ចៅសង្កាត់ប្រទះឡាង បានឲ្យដឹងថា ដីស្រែប្រជាពលរដ្ឋជាង២០០ហិកតា ដែលមានប្រជាពលរដ្ឋ៩០០គ្រួសារជាម្ចាស់ បានកំពុងជួបគ្រោះរាំងស្ងួត។ លោក អែម ឆែម បន្តថា ស្រែពលរដ្ឋដែលរងគ្រោះនោះមានចំនួន៣ភូមិ គឺភូមិភា ភូមិអង្គ និងភូមិប្រទះឡាង ស្រូវបានស្វិតខូចខាតស្ទើរទាំងស្រុង តែដោយមានការយកចិត្តទុកដាក់ពីសំណាក់លោកអភិបាលខណ្ឌ បានទំនាក់ទំនងទៅខាងមន្ទីរធនធានទឹក ស្នើសុំម៉ាស៊ីនបូមទឹកដើម្បីជួយស្រោចស្រពស្រូវ សន្ទូង សំណាបប្រជាពលរដ្ឋ។
មានប្រសាសន៏ក្នុងការត្រួតពិនិត្យស្ថានីយបូមទឹក និងពិនិត្យផលដំណាំស្រូវដែលរងគ្រោះនោះ លោកអភិបាលក៏បានពាំនាំនូវមតិផ្តាំផ្ញើពីសំណាក់សម្តេចតេជោ ហ៊ុន សែន និងលោកជំទាវកិតិ្តព្រឹទ្ធបណ្ឌឹត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចំពោះបងប្អូនប្រជាពលរដ្ឋដែលបានរងគ្រោះធម្មជាតិនាពេលនេះផងដែរ ។ លោកអភិបាលបានបញ្ជាក់ថា ជានិច្ចកាលសម្តេចនិងលោកជំទាវតែងតែយកចិត្តទុកដាក់យ៉ាងខ្លាំងបំផុតចំពោះបងប្អូនប្រជាយើងដែលរងគ្រោះដោយយថាហេតុ ។ ប្រជាពលរដ្ឋទីទ័លក្រ រងគ្រោះដោយអគី្គភ័យ ខ្យល់ព្យុះ រលំផ្ទះ គឺលោកជំទាវកិតិ្តព្រឹទ្ធបណ្ឌឹតបានក្រើនរំលឹកដល់សាខាកាកបាទក្រហមគ្រប់លំដាប់ថ្នាក់ យកចិត្តទុកដាក់ និងនាំយកអំណោយចុះផ្ទាល់នៅនិងកន្លែងភ្លាមៗ ។
ពាក់ព័ន្ធនិងការចុះត្រួតពិនិត្យស្ថានីយបូមទឹក និងគ្រោះរាំងស្ងួតរបស់ប្រជាពលរដ្ឋខាងលើ លោកអភិបាលក៏បានឲ្យដឹងដែរថា នៅពេលដែលលោកបានទទួលដំណឹងនេះពីចៅសង្កាត់ថា ប្រជាពលរដ្ឋរបស់គាត់បានរងគ្រោះរាំងស្ងួតគ្មានទឹកធ្វើស្រែភ្លាមនោះ រូបលោកផ្ទាល់ក៏បានចុះមកដល់ភ្លាមនិងបានទំនាក់ទំនងទៅខាងមន្ទីរធនធានទឹកដើម្បីឲ្យជួយផ្តល់ម៉ាស៊ីនបូមទឹកដល់សាលាខណ្ឌ ។ ពេលដែលគេផ្តល់ម៉ាស៊ីនបូមទឹក ខាងសាលាខណ្ឌក៏ដាក់ទៅបូមទឹកជួយសង្គ្រោះផលដំណាំស្រូវពលរដ្ឋដែលក្រៀមស្វិតនោះ។
លោក នុត ពុធដារ៉ា ក៏បានបញ្ជាក់ឲ្យដឹងដែរថា យើងបានចាប់ផ្តើមបូមតាំងពីថ្ងៃទី១៦ សីហាមកម្ល៉េះ ហើយក្នុង១ម៉ោងត្រូវការប្រេង១០លីត្រ ។ ប្រេងទាំងនេះ គឺជាការឧបត្ថម្ភពីសាលារាជធានីភ្នំពេញ ។ ក្នុងនោះលោកអភិបាលក៏បានសន្យាថា នឹងបូមទឹកដាក់ស្រែរបស់ពលរដ្ឋរហូតដល់ស្រូវរបស់ពលរដ្ឋទទួលផលអស់ហើយ លែងត្រូវការទឹក ។
ដោយឡែកប្រជាពលរដ្ឋជាង៩០០គ្រួសារជាម្ចាស់ស្រែចំនួន២០០ហិកតានោះ ពេលនេះបានសម្តែងការសប្បាយចិត្តយ៉ាងខ្លាំងចំពោះលោកអភិបាលខណ្ឌដង្កោ ដែលបានយកចិត្តទុកដាក់ចំពោះការខ្វះខាតរបស់ពួកគាត់ផងដែរ៕