ភ្នំពេញ ៖ ឆ្លើយតបតាមការអញ្ជើញរបស់លោកTom Rowland អភិបាលទីក្រុងCleveland នៃរដ្ឋTennessee របស់សហរដ្ឋអាមេរិកនារាត្រីថ្ងៃទី១៨ ខែសីហា ឆ្នាំ២០១២ គណៈប្រតិភូសាលារាជធានីភ្នំពេញ ដឹកនាំដោយលោក កែប ជុតិមា អភិបាលរាជធានីភ្នំពេញ និងលោកជំទាវ បានអញ្ជើញចាកចេញពីអាកាសយានដ្ឋានអន្តរជាតិភ្នំពេញ ដើម្បីទៅបំពេញទស្សនកិច្ចជាផ្លូវការនៅទីក្រុង Cleveland រដ្ឋTennessee សហរដ្ឋអាមេរិកចាប់ពីថ្ងៃទី១៨ ដល់ថ្ងៃទី២៦ ខែសីហា ឆ្នាំ២០១២ ក្នុងគោលបំណងជួបពិភាក្សាជាមួយឥស្សរជនសំខាន់ៗរបស់ទីក្រុងនេះ និងឈានទៅពេលអនាគត ចងសម្ព័ន្ធមេត្រីភាពរវាងរាជធានីភ្នំពេញ និងទីក្រុងCleveland សហរដ្ឋអាមេរិកដ៍ជិតស្និទ្ធលើការងារអភិអវឌ្ឍន៍។
ក្នុងខណៈពេលស្នាក់នៅទីក្រុង Cleveland លោកអភិបាលរាជធានីភ្នំពេញ និងលោកជំទាវ ព្រមទាំងសហការី នឹងគ្រោងចូលជួបពិភាក្សាការងារជាបន្តបន្ទាប់ជាអាទិ៍រួមមាន លោក Gary Farlow ប្រធានសភាពាណិជ្ជកម្មទីក្រុង CLEVELANDលោកKevin Brooks តំណាងរាស្ត្ររដ្ឋ TENNESSEEលោកTom Rowland អភិបាលក្រុង CLEVELANDលោក Dr. Bill George ប្រធានអង្គការ People Care and Learning និង លោកBill Haslam ប្រធានរដ្ឋ TENNESSEE។ ជាមួយគ្នានេះ គណៈប្រតិភូ នឹងអញ្ជើញទៅទស្សនានៅតំបន់ឧស្សាហកម្ម និងតំបន់ទេសចរណ៏ នៅជុំវិញទីក្រុង Cleveland និងទីក្រុងនានាផ្សេងទៀតរបស់រដ្ឋ TENNESSEE ផងដែរ ។
សូមបញ្ជាក់ផងដែរថា ក្រោមការជួយជ្រោមជ្រែងពីទីក្រុងCleveland រដ្ឋTennessee នេះ និងដោយមានការចូលរួមពីសប្បុរសជននានារបស់ទីក្រុង Cleveland រួមទាំងសិល្បៈករសិល្បៈការនីនៅសហរដ្ឋអាមេរិកអង្គការ People Care and Learning បានផ្តល់កិច្ចសហប្រតិបត្តិការចំពោះគម្រោងសាងសង់ហេដ្ឋារចនាសម្ព័ន្ធផ្សេងៗ និងសាងសង់លំនៅដ្ឋានថ្មី នៅសហគមន៏ភូមិអណ្តូង៣ សង្កាត់គោករកា ខណ្ឌពោធិ៍សែនជ័យរាជធានីភ្នំពេញដែលមានទឹកប្រាក់ប្រមាណ២លានដុល្លារសហរដ្ឋអាមេរិក ក្នុងនោះនៅជំហានទី១ (សម្រាប់ឆ្នាំ២០១២ ) សហគមន៍ភូមិអណ្តូង៣ទទួលបានទឹកប្រាក់ចំនួន៣០ម៉ឺនដុល្លារអាមេរិក ដើម្បីសាងសង់អគារជាន់ទី៣សម្រាប់ការបណ្តុះបណ្តាលមុខជំនាញវិជ្ជាជីវៈមួយល្វែងប្រព័ន្ធលូ០៨ខ្សែ ផ្លូវបេតុង០៨ខ្សែ និងផ្សារលក់ដូរមួយខ្នងរួចហើយដែរ ។ គណៈប្រតិភូសាលារាជធានីភ្នំពេញចំនួន៩រូបដែលបានអញ្ជើញទៅទស្សនៈកិច្ចនៅទីក្រុងCleveland នៃរដ្ឋTennessee របស់សហរដ្ឋអាមេរិកចាប់ពីថ្ងៃទី ១៨ដល់ថ្ងៃទី២៦ ខែសីហា ឆ្នាំ២០១២នេះ គឺតបតាមការអញ្ជើញរបស់អង្គការ People Care and learning សហរដ្ឋអាមេរិកដែលអង្គការនេះគេ បានចាប់អារម្មណ៍ជួយបងប្អូនប្រចាពលរដ្ឋកម្ពុជាដែលកំពុងរស់នៅសហគមភូមិ អណ្ដូង នៅសង្កាត់គោករការ ខណ្ឌ ពោធិ៍សែនជ័យ រាជធានីភ្នំពេញ ៕