ខេត្តព្រះវិហារ ៖ ផ្តើមចេញពីការយកចិត្តទុកដាក់របស់ថ្នាក់ដឹកនាំរាជរដ្ឋាភិបាល ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវតែងបានឧបត្ថម្ភស្បៀងអាហារជាប្រចាំដល់កទ័ពគ្រួសារ កងទ័ពនៅតំបន់ព្រំដែន ដើម្បីបំពេញតម្រូវការខ្វះខាតក្នុងជីវភាពរស់នៅប្រចាំថ្ងៃ ។ ជាក់ស្តែងនៅព្រឹកថ្ងៃទី១៩ ខែសីហានេះ ឧត្តមសេនីយ៏ឯក ច័ន្ទ លំផាត់ នាយរងសេនាធិការចំរុះ និងជាតំណាងដ៏ខ្ពង់ខ្ពស់នាយឧត្តមសេនីយ៏ គន់ គីម អគ្គមេបញ្ជាការរង និងជានាយសេនាធិការចំរុះនៃកងយោធពលខេមរភូមិន្ទ បាននាំយក អង្ករចំនួន៥១តោន និងមីចំនួន១.១៣៩កេស ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងលោកជំទាវ ទៅប្រគល់ជូនដល់ដៃគ្រួសារកងទ័ព ស្ថិតក្នុងអង្គភាពទីបញ្ជាការកងពលធំអន្តរាគមន៏លេខ៣ កងពលតូចអន្តរាគមន៏លេខ៧ និងកងពលតូចអន្តរាគមន៏លេខ៩ ប្រចាំការនៅទិសប្រាសាទព្រះវិហារ។
វត្តមានរួមដំណើរនាឱកាសនោះមានឧត្តមសេនីយ៏ឯក ស្រី ឌឹក នាយរងសេនាធិការចំរុះ និងជាមេបញ្ជាការកងពលធំអន្តរាគមន៏លេខ៣, ឧត្តមសេនីយ៏ឯក សេង វុទ្ធី នាយកទីចាត់ការហិរញ្ញវត្ថុអគ្គបញ្ជាការ ព្រមទាំងនាយទាហានប្រចាំការនៅទិសប្រាសាទព្រះវិហារជាច្រើនរូបទៀត។
មានមតិសំណេះសំណាលនាឱកាសនោះ ឧត្តមសេនីយ៏ឯក ច័ន្ទ លំផាត់ ក្នុងនាមនាយឧត្តមសេនីយ៏ គន់ គីម បានពាំនាំនូវប្រសាសន៏ផ្តាំផ្ញើសាកសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន និងលោកជំទាវកិតិ្តព្រឹទ្ធបណិ្ឌត ជូនចំពោះបងប្អូនគ្រួសារកងទ័ពទាំងអស់ប្រកបដោយសេចក្តីនឹករលឹក និងសូមថ្លែងការកោតសរសើរចំពោះកិច្ចខិតខំទាំងឡាយ ដែលបងប្អូនគ្រួសាកងទ័ពបានបំពេញកន្លងមក នោះ គឺការរៀបចំលំនៅឋាន និងការបង្កបង្កើនផលប្រកបដោយសោភ័ណភាពស្រស់បំព្រង កសាងបានជីវភាពសមរម្យ និងការរស់នៅប្រកបដោយភាពសុខដុមរមនា ។ លោកបានបន្តថា បើទោះបីក្នុងកាលៈទេសៈបច្ចុប្បន្នស្ថានការណ៏នៅតំបន់ព្រំដែនមានសភាពល្អប្រសើរក៏ដោយ ក៏សម្តេច និងលោកជំទាវ នៅមិនភ្លេចអំពីសុខទុក្ខកងទ័ព និងគ្រួសារកងទ័ពនៅតំបន់ព្រំដែន ព្រោះថាការលំបាករបស់កងទ័ព ក៏ដូចជាការលំបាករបស់សម្តេចនិងលោកជំទាវដែរ ។ លោក ច័ន្ទ លំផាត់ បានផ្តាំផ្ញើដល់ថ្នាក់ដឹកនាំកងពល នាយទាហាន ពលទាហាន ព្រមទាំងគ្រួសារកងទ័ពត្រូវបន្តការ យកចិត្តទុកដាក់ដល់ការងារបង្កបង្កើនផលឲ្យអស់ផ្ទៃដី ជាពិសេសការដាំដំណាំរួមផ្សំ និងការចិញ្ចឹមសត្វឲ្យបានច្រើន ដើម្បីលើកកម្ពស់សេដ្ឋកិច្ចក្នុងគ្រួសារ។
សូមបញ្ជាក់ដែរថា ប្រជាពលរដ្ឋដែលបានមកទទួលអំណោយនាពេលនោះមានចំនួន ៣.៤២០គ្រួសារ ដោយក្នុងមួយគ្រួសារៗទទួលបានអង្ករ១៥គីឡូក្រាម និងមី១០កញ្ចប់៕
