សារព័ត៌មានក្យូដូបានផ្សព្វផ្សាយថា កាលពីថ្ងៃទី១៩ ខែសីហា កូរ៉េខាងត្បូងបានសម្ពោធស្ដូបអនុស្សាវរីយ៍នៅលើកោះដុកដូ ដែលជប៉ុនហៅថាកោះតា កេស៊ីម៉ា ដែលកំពុងមានវិវាទយ៉ាងខ្លាំងនោះ ។ បច្ចុប្បន្នប្រជុំកោះទាំងនោះឋិតក្រោមការគ្រប់គ្រងរបស់ទីក្រុងសេអ៊ូល ហើយស្ដូបអនុស្សាវរីយ៍នោះដើម្បីរំលឹក ដល់ប្រជាធិបតី លី ម្យ៉ុងបាក់ ទស្សនកិច្ចទៅកាន់ប្រជុំកោះនោះនាថ្ងៃទី១០ខែសីហា។
ស្ដូបអនុស្សាវរីយ៍ធ្វើពីថ្ម មានកម្ពស់ ១,២ម៉ែត្រ បានដាក់នៅមុខអគារកម្លាំងសន្ដិសុខកូរ៉េខាងត្បូងនៅលើកោះដុកដូ ។ នៅក្នុងការសម្ពោធនោះ ក៏មានរដ្ឋមន្ដ្រីសន្ដិសុខ លោក Maeng Hyung Kyu ចូលរួមផងដែរ ។
លោករដ្ឋមន្ដ្រី Maeng Hyung Kyu មានប្រសាសន៍នៅក្នុងពិធីសម្ពោធនោះ ថា ស្ដូបអនុស្សាវរីយ៍នេះនឹងក្លាយទៅជា តំណាងអធិបតេយ្យភាពរបស់កូរ៉េខាង ត្បូងនៅលើប្រជុំកោះនោះ នឹងជាតំណាងនៃស្មារតីការពារប្រជុំកោះដុកដូ ។ភ្លាមៗនោះ អគ្គរាជទូតជប៉ុនប្រចាំ នៅទីក្រុងសេអ៊ូលបានផ្លើលិខិតជំទាស់ ទៅកាន់ក្រសួងការបរទេសកូរ៉េខាងត្បូង ប្រឆាំងទៅនឹងការសម្ពោធបង្គោលស្ដូបអនុស្សាវរីយ៍នោះ ។
តំណាងទស្សនកិច្ចជាប្រវត្ដិសាស្ដ្រ របស់ប្រធានាធិបតី លី ម្យ៉ុងបាក់ ទៅកាន់ប្រជុំកោះដុកដូ ជាចំណុចចាប់ផ្ដើមបង្កឱ្យមានវិវាទកាន់តែខ្លាំងឡើងរវាងរដ្ឋាភិ បាលទីក្រុងតូក្យូនិងទីក្រុងសេអ៊ូល ។ ទីក្រុងតូក្យូក៏បានសម្រេចកោះហៅមន្ដ្រីស្ថាន ទូតរបស់ខ្លួននៅទីក្រុងសេអ៊ូលត្រឡប់ មកស្រុកវិញ ។ ទន្ទឹមនឹងនោះក៏បាន សម្រេចផ្អាករាល់កម្មវិធីពិភាក្សារវាង ប្រទេសទាំង២ផងដែរ ។
ពាក់ព័ន្ធនឹងវិវាទរវាងកូរ៉េខាងត្បូង និងជប៉ុននោះ រដ្ឋាភិបាលទីក្រុងតូក្យូបាន ស្នើដល់កូរ៉េខាងត្បូងលើកយកវិវាទទាំង នោះទៅដោះស្រាយនៅក្នុងតុលាការយុត្ដិធម៌អន្ដរជាតិ(ICJ) ប៉ុន្ដែភាគីកូរ៉េខាងត្បូងមិនឯកភាពនោះឡើយ ដោយសារតែប្រជុំកោះទាំងនោះស្ថិតក្រោមការគ្រប់គ្រងរបស់ទីក្រុងសេអ៊ូលជាយូរមកហើយ ៕