ខេត្តេសៀមរាប ៖ សមិទ្ធផលនានាដែលមានតម្លៃជាងកន្លះលានដុល្លាអាមេរិក របស់បញ្ជាការដ្ឋានកងរាជអាវុធហត្ថខេត្តសៀមរាប ត្រូវបានសម្ពោធដាក់ឲ្យប្រើប្រាស់កាលពីព្រឹកថ្ងៃទី១៩ ខែសីហា ឆ្នាំ២០១២ ក្រោមអធិបតីភាពលោកឧបនាយករដ្ឋមន្ត្រីទៀ បាញ់ រដ្ឋមន្ត្រីក្រសួងការពារជាតិកម្ពុជានិងមានការចូលរួមពីនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទនិងជាមេបញ្ជាការកងរាជអាវុធហត្ថ លើផ្ទៃប្រទេស ព្រមទាំងមន្ត្រីជាច្រើនរូបទៀត។
តាមរបាយការណ៏របស់លោកឧត្តមសេនីយ៍ត្រី ម៉ន សាម៉ុន មេបញ្ជាការកងរាជអាវុធហត្ថខេត្តសៀមរាប បានឲ្យដឹងថា សមិទ្ធផលនានាដែលដាក់សម្ពោធនាពេលនេះ មានតម្លៃជាង៥៣ម៉ឺនដុល្លារសហរដ្ឋអាមេរិក។ លោកបន្តថា សមិទ្ធផលទាំងនោះមានអគារចំនួន២ខ្នង ដែល១ខ្នងសម្រាប់សេនាធិការ ១ខ្នងជាសាលប្រជុំ រួមជាមួយសមិទ្ធផលផ្សេងទៀត ដូចជាកន្លែងប្រចាំបញ្ជា ឃ្លាំងភស្តុភារ របង រោងឡាន ផ្ទះអន្តរាគមន៍ ចាក់បេតុង និងក្រាលការ៉ូឡាក្នុងទីធ្លាបញ្ជាការដ្ឋាន។
ថ្លែងទៅកាន់អង្គពិធី លោកឧបនាយករដ្ឋមន្ត្រី ទៀ បាញ់ បានកោតសរសើរដល់នាយ នាយរង និងពលអាវុធហត្ថខេត្តសៀមរាបទាំងអស់ ដែលបានខិតខំបំពេញការងារទាំងការការពារសន្តិសុខ ដល់ប្រជាពលរដ្ឋ និងអ្នកទេសចរ ដែលចូលមកទស្សនាតាមបណ្តាប្រាង្គប្រាសាទនានាក្នុងខេត្តសៀមរាប និងទាំងការកសាងអង្គភាព។ លោកឧបនាយករដ្ឋមន្ត្រី ក៏បានជំរុញដល់អង្គភាពនេះបន្ត និងពង្រឹងការអនុវត្ត ការងារទាំងអស់នេះជាបន្តទៀត៕