ក្រុមសកម្មជននិងតំណាងរាស្ដ្រជប៉ុន កាលពីថ្ងៃទី១៩ ខែសីហា បានទៅកាន់ប្រជុំកោះដែលមានវិវាទជាមួយចិន ធ្វើឱ្យមានការក្រោកឈរឡើងបាតុកម្មជាច្រើនពីពលដ្ឋចិន ។ សារព័ត៌មាន AFP បានផ្សព្វផ្សាយថា មាននាវាប្រមាណ២០គ្រឿងតូចៗ ដឹកពលរដ្ឋជប៉ុនប្រមាណ១៥០នាក់ ក្នុង នោះមានតំណាងរាស្ដ្រ៨រូប បានទៅដល់ ប្រជុំកោះសែនកាគូ ដែលជប៉ុនហៅថា កោះដាយូ កាលពីព្រឹកថ្ងៃទី១៩ខែសីហា។ ក្រុមសកម្មជននយោបាយរបស់ជប៉ុនបញ្ជាក់ថា ពួកគាត់មកកាន់កោះនោះ ដើម្បីរំលឹកដល់វិញ្ញាណក្ខន្ធទាហានជប៉ុន បាត់បង់ជីវិតនៅលើកោះនេះអំឡុង សង្គ្រាមលោកលើកទី២ ។
តំណាងរាស្ដ្រ១រូបឈ្មោះ Eiji Kosaka បានឱ្យដឹងថា ពួកគាត់បានដោតទង់ជាតិ ជប៉ុននៅលើកោះនោះ ជាសកម្មភាពមួយ តបតទៅនឹងសកម្មភាពរបស់ចិនកាល ពីថ្ងៃទី១៥ខែសីហា ។
លោក Kenichi Kojima ដែលជា តំណាងរាស្ដ្រមានវត្ដមានក្នុងក្រុមនោះ បានបញ្ជាក់ថា គោលដៅរបស់លោក ចង់បង្ហាញឱ្យពិភពលោកបានដឹងថា ប្រជុំកោះទាំងនោះជារបស់ជប៉ុន ។
កងកម្លាំងការពារដែនសមុទ្រជប៉ុន បានបញ្ជូននាវាយាមល្បាតទំនើបៗការពារក្រុមសកម្មជននយោបាយដែលធ្វើ ដំណើរទៅកាន់កោះនោះ ។ រដ្ឋមន្ដ្រី ក្រសួងការបរទេសចិនប្រតិកម្មភ្លាមៗ ទៅនឹងសកម្មភាពរបស់តំណាងរាស្ដ្រ ជប៉ុន ។ អ្នកនាំពាក្យក្រសួងការបរទេស ចិនបានប្រកាសថា “ក្រុមសកម្មជន នយោបាយរបស់ជប៉ុនបានបំពានទៅលើ អធិបតេយ្យភាពរបស់ចិន” ។ ក្រសួងការបរទេសចិនបានផ្ញើលិខិតជំទាស់ទៅ កាន់រាជទូតជប៉ុនប្រចាំនៅប្រទេសចិន ហើយអំពាវនាវមិនឱ្យមានសកម្មភាព បែបនេះតទៅមុខទៀតឡើយ ។
ចំណែករដ្ឋមន្ដ្រីការបរទេសកោះតៃវ៉ាន់ ក៏បានប្រកាសពីអធិបតេយ្យភាពរបស់ ខ្លួននៅលើប្រជុំកោះនោះផងដែរ ទន្ទឹម នឹងនោះ តៃវ៉ាន់ក៏បានកោះហៅតំណាង ស្ថានទូតជប៉ុននៅកោះតៃវ៉ាន់ ដើម្បីប្រឆាំងទៅនឹងសកម្មភាពខាងលើ ។ មន្ដ្រី ការបរទេសកោះតៃវ៉ាន់ប្រកាសថា “សកម្មភាពខាងលើរបស់ជប៉ុនមិនខុស អ្វីពីចាក់សាំងចូលភ្លើងនៅក្នុងវិវាទ អធិបតេយ្យភាពប្រជុំកោះទាំងនោះ” ។
ដំណើរទៅកាន់ប្រជុំកោះរបស់តំណាងរាស្ដ្រជប៉ុន កើតឡើងក្រោយប៉ុន្មានថ្ងៃ ដែលរដ្ឋាភិបាលទីក្រុងតូក្យូបានបណ្ដេញ ពលរដ្ឋចិន១៤នាក់ដែលចូលទឹកដីជប៉ុន ខុសច្បាប់ ត្រូវចាប់ខ្លួនកាលពីថ្ងៃទី១៥ ខែសីហា ។
ពាក់ព័ន្ធទៅនឹងសកម្មភាពខាងលើ នេះផងដែរ ពលរដ្ឋចិននៅគ្រប់ទិសទី បានដង្ហែក្បួនបាតុកម្មប្រឆាំងទៅនឹង សកម្មភាពបណ្ដេញពលរដ្ឋចិន១៤នាក់ ចេញពីកោះដែលចិនអះអាងថាជាអធិប តេយ្យរបស់ខ្លួននោះ ។
ពលរដ្ឋប្រមាណ២ពាន់នាក់ដង្ហែក្បួនបាតុកម្មនៅតាមបណ្ដាខេត្ដជាច្រើន ដោយស្រែកហ៊ោកញ្ជ្រៀវពីអធិបតេយ្យភាពរបស់ចិននៅប្រជុំកោះទាំងនោះ ហើយក្រុមបាតុករក៏បានដុតទង់ជាតិជប៉ុនទៀតផង ។
ក្រុមសកម្មជនចិនបានផ្សព្វផ្សាយ តាមប្រព័ន្ធអ៊ិនធើណែត ដោយអំពាវនាវ ដល់ពលរដ្ឋទូទាំងប្រទេសដង្ហែក្បួនបាតុកម្មប្រឆាំងនឹងជប៉ុន ពិសេសនៅតាម តំបន់ដែលមានក្រុមហ៊ុនជប៉ុនវិនិយោគ ៕