កំពង់ធំ ៖ យុវជនស្ម័គ្រចិត្តសម្តេចតេជោ ក្រុមទី៨១ ចុះវាស់វែងដីធ្លី ស្រុកកំពង់ស្វាយ ខេត្តកំពង់ធំ រួមជាមួយសមាគមយុវជនកម្ពុជាខេត្ត បានរៀបចំបទបង្ហាញចែករំលែកបទពិសោធន៍ការសិក្សា និងការងារដល់សិស្សដែលទើបនឹងប្រលងចប់ថ្នាក់ទី១២ នៅវិទ្យាល័យហ៊ុន សែនត្បែង ស្រុកកំពង់ស្វាយ ខេត្តកំពង់ធំ នាព្រឹកថ្ងៃអាទិត្យ ទី១៩ ខែសីហា ឆ្នាំ២០១២ ជាថ្ងៃឈប់សំរាក ពីការងារចុះជួយវាស់វែងដីធ្លី ជូនប្រជាពលរដ្ឋ។
លោក កេង ថា សមាជិកក្រុម២២ អតីតប្រធានសមាគមនិស្សិតវិទ្យាស្ថានជាតិពាណិជ្ជសាស្ត្រ និងជាប្រធានយុវជន ស្ម័គ្រចិត្តសម្តេចតេជោក្រុមទី៨១ បានធ្វើបទបង្ហាញចែករំលែកបទពិសោធន៍ដល់ប្អូនៗជាសិស្សដែលទើបប្រលងចប់ថ្នាក់ទី១២ អំពីការជ្រើសរើសជំនាញ ការសិក្សាពីបច្ចេកវិទ្យាព័ត៌មានវិទ្យាកុំព្យូទ័រ ភាសាបរទេស ការត្រៀមលក្ខណៈក្លាយជានិស្សិតចូលសិក្សានៅសាកលវិទ្យាល័យ ពិសេសការពង្រឹងវិន័យអត្តចរិតអាកប្បកិរិយា និងសេចក្តីថ្លៃថ្នូរអោយសមជាយុវជនប្រកបដោយ ធនធានដ៏ល្អសំរាប់ប្រទេសជាតិ។ លោក កេង ថា ក៏បានបញ្ជាក់បន្ថែមដល់សិស្សានុសិស្សអោយចូលរួមការងារស្ម័គ្រចិត្តក្នុងសង្គម ដូចជាការងារសមាគមនិស្សិត សមាគមយុវជនកម្ពុជា យុវជនកាកបាទក្រហម យុវជនកាយរិទ្ធិ៘ ត្រូវចៀស អោយឆ្ងាយពីគ្រឿងញៀន ត្រូវគោរពច្បាប់ចរាចរណ៍ និងត្រូវទៅចុះឈ្មោះបោះឆ្នោតអោយបានគ្រប់ៗគ្នាចាប់ពីថ្ងៃទី០១ ខែកញ្ញា ដល់ថ្ងៃទី១២ ខែតុលា ឆ្នាំ២០១២ ដើម្បីចូលរួមការបោះឆ្នោតជ្រើសរើសតំណាងរាស្ត្រឆ្នាំ២០១៣ ខាងមុខនេះ ។
លោក ជា វ៉ាន់ចាន់ ប្រធានសមាគមយុវជនកម្ពុជាខេត្តកំពង់ធំ ក៏បានផ្តល់នូវបទពិសោធន៍ការសិក្សា និងការងារក្នុងសង្គមផងដែរ ពិសេសបានលើកឡើងអំពីសកម្មភាពរបស់សមាគមយុវជនកម្ពុជាក្នុងខេត្ត និងទិសដៅសមាគមនៅពេលអនាគត។
កញ្ញា ខុន ប៉ូឡែន សិស្សទើបប្រលងចប់ថ្នាក់១២តំណាងសិស្សទាំងអស់ បានថ្លែងអំណរគុណយ៉ាងជ្រាលជ្រៅដល់ក្រុមយុវជនស្ម័គ្រចិត្តសម្តេចតេជោស្រុកកំពង់ស្វាយ ដែលឆ្លៀតពេលវេលាឈប់សំរាក ផ្តល់នូវបទពិសោធន៍ ចំណេះដឹងល្អៗក្នុងការសិក្សា និងការងារដល់សិស្សានុសិស្សទាំងអស់ថែមទៀត។
ក្នុងពេលនោះដែរ យុវជនស្ម័គ្រចិត្តសម្តេចតេជោក្រុមទី៨១ និងសមាគមយុវជនកម្ពុជាខេត្តកំពង់ធំ បានដាំកូនឈើដើមគគីរដែលបានមកពីរដ្ឋបាលព្រៃឈើ ស្រុកកំពង់ស្វាយទុកជាអនុស្សាវរីយ៍ជាក្នុងវិទ្យាល័យហ៊ុន សែនត្បែងផងដែរ៕ ប៊ុន រដ្ឋា