ខេត្ដបន្ទាយមានជ័យ ៖ កាលពីព្រឹកថ្ងៃទី១៩ ខែសីហា ឆ្នាំ២០១២ នៅសាលាស្រុកម៉ាឡៃ ខេត្ដបន្ទាយមានជ័យ មានរៀបចំពិធីបើកវគ្គបណ្ដុះបណ្ដាលដល់មន្ដ្រីនរគបាលអន្ដោប្រវេសន៍ និងមន្ដ្រីនគរបាលច្រកទ្វារ តំបន់ជាប់ព្រំដែនកម្ពុជា-ថៃ ដើម្បីវាស់ស្ទង់សមត្ថភាពការងារ ។ ពិធីនេះមានការអញ្ជើញជាអធិបតីពីលោកឧត្ដមសេនីយ៍ត្រី ព្រំ ពិមល អនុប្រធាននាយកដ្ឋាននគរបាលអន្ដោប្រវេសន៍, លោកឧត្ដមសេនីយ៍ត្រី តាន់ សុខវិជ្ជា អនុប្រធាននាយកដ្ឋាននគរបាលអន្ដោប្រវេសន៍ មានការចូលរួមពីលោកវរសេ នីយ៍ឯក ឃួន ប៊ុនហួន ស្នងការរងនៃស្នងការដ្ឋាននគរបាលខេត្ដបន្ទាយមានជ័យ ទទួលផែនសន្ដិសុខ, លោកវរសេនីយ៍ឯក សំ ជិត ស្នងការរងនគរបាលខេត្ដ ទទួលផែនព្រំដែន និងមានសិក្ខាកាមចំនួន២៣រូប(អធិការ អធិការរងតាមបណ្ដា ស្រុក-ក្រុង មន្ដ្រីនគរបាលប៉ុស្ដិ៍ជាប់ព្រំដែន) ។
លោកវរសេនីយ៍ឯក ឃួន ប៊ុនហួ បានមានប្រសាសន៍លើកឡើងក្នុងពិធីនោះថា ពិធីនេះមានគោលបំណងសំខាន់ពង្រឹង ការងារមុខ ជំនាញអន្ដោប្រវេសន៍ និងកិច្ចសហប្រតិបត្ដិការក្នុងជំនាញច្រកទ្វារតំបន់ឱ្យមានភាពល្អប្រសើរ ប៉ុន្ដែនៅពុំ ទាន់ទទួលបានតាមកម្រិតសំណូមពររបស់អគ្គស្នងការនគរបាលជាតិនៅឡើយ សំខាន់បំផុតគឺការទប់ស្កាត់ជនបរទេស ខុសច្បាប់ និងសកម្មភាពនានាតាមបន្ទាត់ព្រំដែន ដូចជាបញ្ហាចំណាកស្រុក ការបញ្ជូនប្រជាជនខុសច្បាប់ និងឧបទ្ទវ ហេតុផ្សេងៗដែលពាក់ព័ន្ធនឹងជនបរទេស ។ ប៉ុន្ដែទោះមិនទាន់បានរលូនក៏ដោយ ក្រោមការដឹកនាំរបស់អគ្គស្នងការរង នគបាលជាតិ ពិសេសលោក សុខ ផល អគ្គស្នងការរងទទួលការងារសន្ដិសុខ តែងបានដាក់ចេញនូវផែនការសំខាន់ៗ ជាបន្ដបន្ទាប់ ធ្វើឱ្យការងារទទួលបានលទ្ធផលនិងជោគជ័យ ។
លោកឧត្ដមសេនីយ៍ត្រី ព្រំ ពិមល បានមានប្រសាសន៍កោតសរសើរចំពោះស្នងការ ស្នងការរងខេត្ដ ដែលបានរៀបចំ ពិធីតាមបែបបទរដ្ឋបាល ជាមួយនោះគឺការដឹកនាំក្នុងការទប់ស្កាត់រាល់បទល្មើសនានាទទួលបានលទ្ធផលល្អប្រសើរ ជាបន្ដបន្ទាប់ ។ សូមបញ្ជាក់ថា ក្នុងវគ្គបណ្ដុះបណ្ដាលនេះ គណៈអធិបតីបានដាក់សំណូរធ្វើតេស្ដប្រឡងវាស់ស្ទង់សមត្ថកិច្ចភាពលើ ខ្លឹមសារមុខជំនាញផងដែរ ៕