ភ្នំពេញ ៖ គណបក្សរាជានិយមហ៊្វុនស៊ិនប៉ិច និងគណបក្សនរោត្តម រណឫទ្ធិ បានជួបពិភាក្សាគ្នាបង្ហាញពីជំហរឯកភាពគ្នា ហើយការជួបនេះជាលើកដំបូងហើយដែលគណបក្សរាជានិយមទាំងពីរបានជួបពិភាក្សាគ្នាជាទ្រង់ទ្រាយធំ បន្ទាប់ពីការបែកបាក់ជាច្រើនលើកច្រើនសា និងបានបង្ហាញពីជំហរឯកភាពលើការរួមច្របាច់បញ្ចូលគ្នា ក្នុងបុព្វហេតុដើម្បីរកសំឡេងគាំទ្រពីប្រជាពលរដ្ឋនៅក្នុងការបោះឆ្នោតថ្នាក់ជាតិឆ្នាំ២០១៣ នាពេលខាងមុខ។
កាលពីព្រឹកថ្ងៃទី១៨ខែសីហា ឆ្នាំ២០១២ ថ្នាក់ដឹកនាំគណបក្សហ៊្វុនស៊ិនប៉ិចនិងថ្នាក់ដឹកនាំនៃគណបក្សនរោត្តម រណឫទ្ធិ ដែលគ្រោងនឹងប្ដូរឈ្មោះ (ជាតិនិយម ) បានជួបពិភាក្សាពីដំណើរការនៃការរួមសមាជិកបញ្ចូលគ្នាដែលគ្រោងនឹងធ្វើសមាជនៅថ្ងៃទី២៥ ខែសីហាឆ្នាំ២០១២នេះ។ កិច្ចប្រជុំនោះដឹកនាំដោយលោក ញឹក ប៊ុនឆៃ ប្រធានប្រតិបត្តិគណបក្សហ៊្វុនស៊ិនប៉ិចនិងលោក សៅរ៉ានី ប្រធានស្តីទីគណបក្សនរោត្តមរណឫទ្ធិ និងមានការចូលរួមពីប្រធានក្រុមការងារ និងប្រធានគណៈកម្មាធិការប្រតិបត្តិខេត្ត នៃគណបក្សទាំងពីរបានចូលរួមជាច្រើនរូប នៅទីស្នាក់ការកណ្តាលគណបក្សហ៊្វុនស៊ិនប៉ិចក្នុងសង្កាត់បាក់ខែង ខណ្ឌឫស្សីកែវ រាជធានីភ្នំពេញ។
កិច្ចប្រជុំនោះបានឯកភាពនិងគាំទ្រគ្នាទៅវិញទៅមក ពិសេសទៅតាមអ្វីដែលថ្នាក់ដឹកនាំទាំងពីរបានចុះហត្ថលេខាលើកិច្ចព្រមព្រៀងបង្រួបបង្រួមគ្នាកាលពីថ្ងៃទី២៤ ខែឧសភា ឆ្នាំ២០១២ នៅវិមានសន្តិភាព នៃទីស្តីការគណៈរដ្ឋមន្ត្រី។ គណបក្សទាំងពីរបានពិភាក្សាលំអិតអំពីគោលនយោបាយរួមបន្ទាប់ពីច្របាច់បញ្ចូលជាមួយគ្នានិងការរៀបចំពង្រឹងនៅតាមមូលដ្ឋានដោយជ្រើសរើសតាមគោលការណ៍សំឡេងឆ្នោតគណបក្សណា ដែលមានសំឡេងច្រើនធ្វើជាប្រធាននៅថ្នាក់ឃុំ ស្រុក និងខេត្ត។ គណបក្សមានសំឡេងបន្ទាប់ធ្វើជាអនុប្រធាន នៃក្រុមការងារគណបក្សរួមទាំងបញ្ហាសំខាន់ៗមួយចំនួនទៀត។
ប៉ុន្តែលោក ញឹក ប៊ុនឆៃ បានស្នើឲ្យពិនិត្យឲ្យបានច្បាស់លាស់ អំពីបេក្ខភាពជាប្រធាន អនុប្រធាន ដែលត្រូវតែងតាំងនៅថ្នាក់មូលដ្ឋានគប្បីមានលក្ខណៈសម្បត្តិគ្រប់គ្រាន់គឺលទ្ធភាពសមត្ថភាព សកម្មភាពការងារ ប្រជាប្រិយភាពជាមួយប្រជាពលរដ្ឋ និងភាពស្មោះត្រង់ បើទោះបីជាអ្នកនោះជាសមាជិកថ្មីក៏ដោយគឺត្រូវតែមានអាទិភាព។
អង្គប្រជុំនោះនូវបានបញ្ជាក់ពីគោលបំណងនៃសមាជគឺធ្វើឡើងដើម្បីបញ្ចូលសមាជិកក្រុមប្រឹក្សាជាតិ បន្ទាប់មកគណៈកម្មាធិការនាយកនិងបញ្ចូលគណៈកម្មាធិការអចិន្ត្រៃយ៍ ហើយមានសមាជិកចូលរួមមកពីរាជធានី ខេត្ត ស្រុក នឹងក្រុមប្រឹក្សាខេត្ត ក្រុមប្រឹក្សាខណ្ឌ-ស្រុក និងក្រុមប្រឹក្សាឃុំ-សង្កាត់ដែលទើបតែជាប់ឆ្នោតនាពេលថ្មីៗនេះតែប៉ុណ្ណោះ ។ សមាជិកគ្រោងនឹងចូលរួមក្នុងឱកាសសាមាជនោះចំនួនប្រមាណ១.៥០០នាក់តំណាងមកពីគណបក្សទាំងពីរ។
ថ្នាក់ដឹកនាំគណបក្សទាំងពីរ និងតំណាងរាជធានី-ខេត្តចូលរួមបានបង្ហាញពីជំហររួមគ្នាក្រោមដំបូលហ្វ៊ុនស៊ិនប៉ិចតែមួយដើម្បីលើកស្ទួយគណបក្សរាជានិយមដែលជាស្នាព្រះហស្ដរបស់សម្ដេចឪ សម្តេចតា ព្រះបាទនរោត្តម សីហនុ ព្រះមហាវីរក្សត្រ នៃយើង។ លោក ញឹក ប៊ុនឆៃ និង លោក សៅ រ៉ានី ប្រធានអង្គប្រជុំបានស្នើសុំឲ្យសមាជិក សមាជិការគ្រប់ជាន់ថ្នាក់បំភ្លេចចោលឲ្យអស់នូវអតីតកាល ហើយងាកមកចាប់ដៃគ្នាឈានទៅរកហ៊្វុនស៊ិនប៉ិចមួយ ដែលមានឈ្មោះបោះសម្លេងក្នុងឆាកនយោបាយឡើងវិញ ហើយនៅថ្ងៃដដែលមានការទទួលទានអាហាររួមគ្នាផងដែរ៕
កោះកែវ