ភ្នំពេញ: សមត្ថកិច្ចចម្រុះ ដែលដឹកនាំដោយលោកព្រះរាជអាជ្ញារង ហោ លីណា លោក ប៉ែន រ័ត្ន ស្នងការរងរាជធានីភ្នំពេញ អធិការខណ្ឌដង្កោ បានសហការគ្នា ចុះឆែកឆេរទីតាំងស្តុកប្រេងម្រះព្រៅមួយកន្លែង កាលពីវេលាម៉ោង ៦ល្ងាច ថ្ងៃទី១៩ ខែសីហា ឆ្នាំ២០១២ នៅចំណុចដីឡូត៍មួយកន្លែង ស្ថិតក្នុងភូមិរលួស សង្កាត់ជើងឯក ខណ្ឌដង្កោ។
ក្នុងប្រតិបត្តិការនោះ សមត្ថកិច្ចឃាត់ខ្លួនបានមនុស្សបីនាក់ ដោយមានទី១- ឈ្មោះ សាយ គី អាយុ៤២ឆ្នាំ ជាជាងផ្សារទ្រុងរថយន្ត និងជាម្ចាស់ដីឡូត៍ ទី២- ឈ្មោះ គឿន ប៉ាង អាយុ២៤ឆ្នាំ ជាកម្មករ ទី៣- ឈ្មោះ ចាន់ រ័ត្ន អាយុ១៦ឆ្នាំ ជាកម្មករ ទាំងពីរនាក់នេះស្នាក់នៅឃុំដំណាក់ត្រយឹង ភូមិចេកខាងត្បូង ស្រុកដងទង់ ខេត្តកំពត។
សមត្ថកិច្ចដកហូតបានរថយន្តស៊ីទែន សម្រាប់ដឹកប្រេងម្រះព្រៅចំនួន២គ្រឿង មានម៉ាកម៉ាស មួយគ្រឿង ពណ៌ត្រេអ៊ី ចំណុះ ៥០០០ លីត្រ និងមួយគ្រឿងទៀតម៉ាក IZUSU គ្មានទ្រុង និងមានប៊ីដុងទទេចំនួន ១១ប៊ីដុង មានប៊ីដុងពណ៌ស ដែលមានប្រេងម្រះព្រៅ ចំនួន២៤លីត្រ ស៊ីទែនពណ៌ស ចំណុះ ១៥០០លីត្រ បង្ហូរអស់នៅសល់តែ ៣លីត្រ។
លោក ប៉ែន រ័ត្ន អធិការរងរាជធានីភ្នំពេញ បានឲ្យដឹងថា ដោយកម្លាំងរបស់លោកបានរាយការណ៍ឲ្យថា មានរថយន្តស៊ីទែនមួយគ្រឿង ដែលមានដាក់ប្រេងម្រះព្រៅនៅក្នុងតួរថយន្ត ហើយផ្សារភ្ជិត មានកម្រាស់២តឹក ដើម្បីបំភ័ន្តភ្នែកសមត្ថកិច្ច៕
