ភ្នំពេញ ៖ វាជាញត្តិគាំទ្រប្រកបដោយអត្ថន័យយ៉ាងជ្រាលជ្រៅបំផុត ដែលបានចុះហត្ថលេខារួមគ្នា ដោយឯកឧត្តម ឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក អូន ព័ន្ធ មុនីរ័ត្ន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី១៨ សីហា ដែលបានហៅសម្តេចអគ្គមហាសេនាបតីតេជោ ហ៊ុន សែន ជា«វីរៈមហាបុរសរដ្ឋ ដ៏ឆ្នើមរបស់កម្ពុជា»នោះ។
ការបកស្រាយស្តីពីការបោះបង្គោលខណ្ឌសីមាព្រំដែនគោក និងការកំណត់ព្រំដែនសមុទ្រ រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម បានប្រព្រឹត្តទៅកាលពីថ្ងៃទី ៩ សីហា ឆ្នាំ ២០១២ ក្នុងសម័យប្រជុំពេញអង្គរដ្ឋសភា ដោយសម្តេចអគ្គមហាសេនាបតីតេជោ ហ៊ុន សែន ដែលត្រូវបានចាត់ទុកជាកិច្ចការប្រវត្តិសាស្ត្រមួយដែលធ្វើឡើងដោយប្រមុខរដ្ឋាភិបាល ដែល មានការ ទទួលខុសត្រូវខ្ពស់នោះ។
ញត្តិគាំទ្ររបស់ក្រសួងសេដ្ឋកិច្ច និងហិរញ្ញវត្ថុ បានអះអាងថា សម្តេចតេជោនាយករដ្ឋមន្ត្រីជា «វីរៈមហាបុរសរដ្ឋដ៏ឆ្នើមរបស់កម្ពុជា» ដែលជានិច្ចកាលបានតម្កល់ប្រយោជន៍ជាតិជាធំ ហ៊ានពុះពារ គ្រប់ឧបសគ្គ មានការទទួលខុសត្រូវខ្ពស់ចំពោះជោគវាសនាប្រទេសជាតិ និងប្រជាជន និងលះបង់ អ្វីៗគ្រប់យ៉ាងដើម្បីបុព្វហេតុ និងផលប្រយោជន៍ជាតិ។សម្តេចតេជោមិនត្រឹមតែជាប្រមុខឥតផ្ទឹមបាន នៃនីតិប្រតិបត្តិតាមរដ្ឋធម្មនុញ្ញប៉ុណ្ណោះទេ ប៉ុន្តែថែមទាំងជាសាស្ត្រាចារ្យ និងជាគរុគណនៃគោល នយោបាយសម្រាប់ទាំងប្រជាជនទូទៅ ទាំងមន្ត្រីរាជការក្រោមឱវាទទៀតផង។
ញត្តិគាំទ្រនោះនិយាយថា តាមចក្ខុវិស័យវែងឆ្ងាយ ត្រឹមត្រូវ និងគោលនយោបាយប្រាកដ និយម សកម្មភាពដឹកនាំ និងប្រតិបត្តិការផ្ទាល់ សម្តេចតេជោនាយករដ្ឋមន្ត្រី មិនគ្រាន់តែបានដឹកនាំការ តស៊ូឲ្យប្រទេសជាតិឲ្យរស់រានមានជីវិតឡើងវិញ ហើយបានកៀងគរប្រជាជនកម្ពុជាទាំងមូលចូលរួម យ៉ាងសស្រាក់សស្រាំជាមួយកងកម្លាំងប្រដាប់អាវុធគ្រប់ប្រភេទ រក្សាការពារបាននូវឯករាជ្យភាព អធិបតេយ្យ និងបូរណភាពទឹកដីឲ្យគង់វង់ប៉ុណ្ណោះទេ ប៉ុន្តែថែមទាំងរក្សាបាននូវសុខសន្តិភាព និងដឹកនាំការអភិវឌ្ឍន៍ប្រទេសជាតិ ព្រមទាំងជាពិសេស បង្កើតបាននូវកិច្ចសហប្រតិបត្តិការល្អជាមួយ ប្រទេសជិតខាងភូមិផងរបងជាមួយកើតបានជាមនុញ្ញផលល្អសម្រាប់តំបន់ថែមទៀតផង។
ញត្តិនោះនិយាយថា យើងខ្ញុំទាំងអស់គ្នាសូមសម្តែងនូវការគាំទ្រទាំងស្រុង ចំពោះប្រសាសន៍ បកស្រាយដ៏ថ្លៃថ្លាគ្មានពីររបស់សម្តេចតេជោនាយករដ្ឋមន្ត្រី ព្រមទាំងមានមោទនភាពយ៉ាងខ្លាំងដោយ មានសម្តេចតេជោជាវីរៈមហាបុរសរដ្ឋរបស់ខ្លួនប្រកបដោយបញ្ញាញាណវៃឈ្លាសក្នុងការដោះស្រាយ គ្រប់បញ្ហាអាយុជីវិតជាតិ សម្រេចបានសមិទ្ធផលជាប្រវត្តិសាស្ត្រ មានការសង្គ្រោះប្រជាជនឲ្យរួចផុតពី របបកម្ពុជាប្រជាធិបតេយ្យប្រល័យពូជសាសន៍ ប៉ុល ពត ការនាំមកតាមរយៈគោលបយោបាយឈ្នះ ឈ្នះ នូវសន្តិភាពបរិបូរណ៍ និងឯកភាពទឹកដីជូនប្រទេសជាតិ ការកសាង និងអភិវឌ្ឍ ហើយសម្រេច បាននូវវិបុលភាព ស្របតាមយុទ្ធសាស្ត្រចតុកោណ ដើម្បីកំណើនការងារសមធម៍ និងប្រសិទ្ធភាព ការពារអធិបតេយ្យ បូរណភាពទឹកដី ការកសាងខ្សែបន្ទាត់ព្រំដែនសន្តិភាព មិត្តភាព សហប្រតិបត្តិការ និង ការអភិវឌ្ឍន៍ និងការលើកតម្កើងកិត្យានុភាពជាតិឲ្យកាន់តែខ្ពស់ត្រដែតលើឆាកអន្តរជាតិ ពិសេស តាម រយៈតួនាទីជាប្រធានអាស៊ាន ឆ្នាំ ២០១២ និងជោគជ័យជាភិយ្យោភាពនៅពេលដែលកម្ពុជាក្នុងនាម ជាប្រធានអាស៊ានបានចូលរួមក្នុងកិច្ចប្រជុំកំពូលជាមួយនឹងប្រមុខរដ្ឋ ប្រមុខរដ្ឋាភិបាលនៃប្រទេស មហាអំណាច G20 នៅ LOS CABOS នាខែមិថុនា ឆ្នាំ ២០១២។
ញត្តិគាំទ្រនោះបានបញ្ជាក់ថា ការបកស្រាយស្តីពីការងារបោះបង្គោលខណ្ឌសីមាព្រំដែនគោក និងការកំណត់ព្រំដែនសមុទ្ររវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ដែលពោរពេញដោយបញ្ញាញាណនិងគតិបណ្ឌិតដ៏ឧត្តុង្គឧត្តម មានទឡ្ហីករណ៍ស៊ីជម្រៅ រឹងមាំ ឡូហ្សិក ប្រកបដោយវិចារវិទ្យា និងគ្រប់ជ្រុងជ្រោយលើគ្រប់ទិដ្ឋភាពទាំងខាងគតិយុត្តិ ទាំងខាងបច្ចេកទេស ដោយផ្អែកលើមូលដ្ឋានប្រវត្តិសាស្ត្រ និងក្របខណ្ឌច្បាប់ ពិតជាបានផ្តល់នូវការយល់ដឹងមានលក្ខណៈ ជាសត្យានុម័តយ៉ាងច្បាស់លាស់ និងត្រឹមត្រូវរបស់ប្រជាជនកម្ពុជាគ្រប់រូបទាំងនៅក្នុង និងក្រៅប្រ ទេសលើការងារបោះបង្គោលខណ្ឌសីមា និងកំណត់ព្រំដែនរបស់ព្រះរាជាណាចក្រកម្ពុជា ជាមួយនឹង ប្រទេសជិតខាងរបស់ខ្លួន។
បទឧទ្ទេសនាមដ៏ថ្លៃថ្លានេះ ដែលជាមេរៀនជាប្រវត្តិសាស្ត្រខាងវិទ្យាសាស្ត្រនយោបាយដ៏មាន តម្លៃ និងជាមូលដ្ឋានគ្រឹះសម្រាប់ស្វែងយល់ និងដោះស្រាយការកំណត់ព្រំដែនកម្ពុជា ហើយរក្សាបានទាំងស្រុងនូវផលប្រយោជន៍ប្រកបដោយនិត្យានុកូលភាពរបស់កម្ពុជា បានកម្ទេចទាំងស្រុងនូវល្បិច កលបោកបញ្ឆោត និងញុះញង់របស់ក្រុមនយោបាយអគតិមួយក្តាប់តូច ដែលតែងតែយកបញ្ហាព្រំដែន ធ្វើជាលេសក្នុងគោលបំណងអាក្រក់ជួជាតិចង់កេងប្រវ័ញ្ចផ្នែកនយោបាយរបស់ពួកគេ ដោយមិនគ្រាន់ តែមិនរវល់អំពីផលប្រយោជន៍ជាតិប៉ុណ្ណោះទេ តែវានាំឲ្យមានការខូចខាតដល់ព្រះរាជាណាចក្រកម្ពុជា ទៀតផង៕
ស្នាយពល