កម្រងឯកសារគោល ស្តីពីបញ្ហាព្រំដែន កម្ពុជា- វៀតណាម ដែលសម្តេចតេជោ ហ៊ុន សែន នាយករដ្ឋមន្ត្រី បានឆ្លើយបំភ្លឺរដ្ឋសភាកាលពីថ្ងៃទី ៩ សីហា ត្រូវបានរដ្ឋាភិបាលផ្សព្វផ្សាយជា សាធារណៈហើយនៅចុងសប្តាហ៍នេះ។ ឯកសារ សម្តេចតេជោ នាយករដ្ឋមន្ត្រី បានបកស្រាយបំភ្លឺសព្វគ្រប់ អំពីបញ្ហាព្រំដែនជាមួយ វៀតណាមនេះក៏ត្រូវ គ្រោងបោះពុម្ពជា សៀវភៅ និងជាឯកសារវីដេអូ និងខ្សែអាត់ សំឡេងផងដែរ។
កម្រងឯកសារ កម្រាស់ ៨៦ ទំព័រដែលជាការពន្យល់របស់ សម្តេចតេជោ ហ៊ុន សែន នាយករដ្ឋមន្ត្រី នៅក្នុងអង្គសភា កាលពីថ្ងៃទី៩ សីហា ត្រូវបានបង្ហោះក្នុងគេហទំព័រទីស្តីការគណៈរដ្ឋមន្ត្រី។
ឯកសារដែលត្រូវបានរដ្ឋាភិបាលចាត់ទុកជាការផ្តល់ការបំភ្លឺដ៏ច្បាស់លាស់ ស្តីពីការងារបោះបង្គោលខណ្ឌសីមាព្រំដែនគោក និងការកំណត់ព្រំដែនសមុទ្រ រវាងកម្ពុជា និងវៀតណាម បានបញ្ជាក់ថា គោលការណ៍សំខាន់ គឺការធានាឲ្យបានដាច់ខាតថា កម្ពុជានឹងមិនបាត់បង់ដីសូម្បីតែ ១ ម៉ែត្រក្រឡាឡើយ។ ក្រៅពីខ្លឹមសារនៃបទបង្ហាញ របសស់ ម្តេចតេជោ នាយករដ្ឋមន្ត្រី ឯកសារនោះក៏មានរំលេចដោយផែនទី រូបថតសកម្មភាពបោះបង្គោលព្រំដែន និងព្រះរាជសាររបស់អតីតព្រះមហាក្សត្រ សម្តេចព្រះ នរោត្តម សីហនុ ស្តីពីបញ្ហាព្រំដែនរវាងកម្ពុជា និងវៀតណាមផងដែរ។
កាលពីថ្ងៃទី៩សីហា សម្តេចតេជោ ហ៊ុន សែន បានប្រើពេលជាង៥ម៉ោងដោយគ្មានឈប់សម្រាកដើម្បីឆ្លើយបំភ្លឺអំពី កិច្ចការព្រំដែនដែលរដ្ឋាភិបាលបានធ្វើជាមួយវៀត ណាម។ ការឆ្លើយបំភ្លឺនេះបានធ្វើឡើងតបតាមការកោះអញ្ជើញរបស់តំណាងរាស្ត្រ គណ បក្សសម រង្ស៊ី។ នៅក្នុងវេទិកានោះ សម្តេចតេជោ នាយករដ្ឋមន្ត្រីបានប្រើប្រាស់ពេលវេលាជាច្រើនដើម្បីវាយបកទៅលើ បក្សប្រឆាំង និងសកម្មជនព្រំដែនទាំងក្នុងនិងក្រៅប្រទេសដែលបានចោទរដ្ឋាភិបាលថា បានធ្វើឲ្យបាត់បង់ទឹកដីខ្មែរក្នុងការបោះបង្គោលព្រំដែនជាមួយវៀតណាម។