កំពង់ចាម ៖ ក្រុមការងារលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តកំពង់ចាម ដឹកនាំដោយលោកវរសេនីយ៍ឯកជឹម សេងហុង ស្នងការរងនគរបាលខេត្តកំពង់ចាម និងជាប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តកំពង់ចាម បានចុះផ្សព្វផ្សាយច្បាប់ ផលប៉ះពាល់នៃគ្រឿងញៀន និងការអនុវត្តផែនការប្រៀបសមរភូមិប្រយុទ្ធប្រឆាំងគ្រឿងញៀន កាលពីព្រឹកថ្ងៃទី១៧ ខែសីហា ឆ្នាំ២០១២ នៅវត្តរក្សរមនីវន្ត(ហៅវត្តតូង)សង្កាត់-ក្រុងសួង ខេត្តកំពង់ចាម ដោយមានការចូលរួមពីលោកជា សុខរិទ្ធ អភិបាលក្រុងសួងនិងលោកស៊ីម ស៊ីថូវ ប្រធានក្រុមប្រឹក្សាក្រុងសួង ចូលរួមជាគណៈអធិបតី ព្រមទាំងលោក-លោកស្រី កងកំលាំងប្រដាប់អាវុធ មន្ត្រីរាជការជុំវិញសាលាក្រុងសួង លោកគ្រូ-អ្នកគ្រូ អាជីវកលក់មាស-ម្ចាស់ផ្ទះសំណាក់ ក្លឹបកំសាន្ត មេឃុំ ក្រុមប្រឹក្សាឃុំ មេភូមិ អនុភូមិ សរុបចំនួន២៣៥នាក់ ។
លោកជឹម សេងហុង បានមានមតិលើកឡើងនូវវិធានការ ការពារ សភាពការណ៍នានាដូចជា៖
១-គោលនយោបាយ ភូមិ ឃុំ មានសុវត្ថិភាពទាំង៩ចំណុច គ្មានចោរលួច ចោរប្លន់ គ្មានការប្រើអំពើហិង្សាក្នុងគ្រួសារ គ្មានការជួញដូរមនុស្សឬជួញដូរផ្លូវភេទ គ្មានការចែកចាយ ជួញដូរ ប្រើប្រាស់គ្រឿងញៀន គ្មានក្រុមក្មេងទំនើង គ្មានល្បែងស៊ីសង និងគ្មានគ្រោះថ្នាក់ចរាចរ ។ ២-កិច្ចការពារ ប្រុងប្រយ័ត្នជាយថាហេតុដល់ក្រុមអាជីវក លក់មាស ប្តូរប្រាក់ ត្រូវចេះពិនិត្យមើលជនសង្ស័យដែលមានពាក់ម៉ាស់ ពាក់មួកសុវត្ថិភាព ពាក់អាវធំពីក្រៅ(ងាយលាក់អាវុធ)និងមានបក្ខពួកវា បញ្ឆេះម៉ូតូ រថយន្តចាំខាងក្រៅ ។ ៣-បង្ហាញពីអត្តសញ្ញាណ អាកប្បកិរិយាអ្នកប្រើប្រាស់គ្រឿងញៀន ស្វែងយល់អំពីសំណល់ផ្សេងៗ(ដបទឹកសុទ្ធមានចោះរន្ធនៅគំរប មានក្រដាស់អាលុយមីញូម មានទុយយោ)ដែលជាវត្ថុតាងបញ្ជាក់ថា ទីនេះមានការសេពគ្រឿងញៀន ដើម្បីមានមូលដ្ឋានរាយការណ៍ជូនសមត្ថកិច្ច ឈានទៅការស្រាវជ្រាវរកជនសង្ស័យជាអ្នកប្រព្រឹត្ត ។ ៤-រួមគ្នាជួយការពារកន្លែងកើតហេតុ បទល្មើសព្រហ្មទណ្ឌដើម្បីបង្កលក្ខណៈឲ្យមន្ត្រីជំនាញ បច្ចេកទេសវិទ្យាសាស្ត្រ មានលទ្ធភាពក្នុងការប្រមែប្រមូលវត្ថុតាង ដើម្បីដាក់បន្ទុកដល់ជនល្មើស ។
នៅក្នុងឱកាសនោះដែរលោកស្នងការរងជឹម សេងហុង បានធ្វើការផ្សព្វផ្សាយច្បាប់នៃការប្រព្រឹត្តគ្រឿងញៀននិងទោសទណ្ឌផងដែរ។
លោកជា សុខរិទ្ធ អភិបាលក្រុងសួងបានមានមតិសំណេះសំណាលដល់អាជីវកលក់មាស ប្តូរប្រាក់ទាំងអស់ ត្រូវលើកកំពស់ស្មារតីប្រុងប្រយ័ត្ន និងរាយការណ៍ជូនសមត្ថកិច្ចឲ្យទាន់ពេលវេលា នៅពេលមានជនសង្ស័យបំរុងធ្វើសកម្មភាពឬក្រោយពេលប្រព្រឹត្តបទល្មើសរួច ៕
សាន វិឡែម