ខេត្តស្វាយរៀង ៖ បន្ទាប់ពីពិធីសំណេះសំណាលជាមួយសមាជិក សមាជិការ សមាគមយុវជនកម្ពុជាប្រចាំខេត្តស្វាយរៀងរួចមក នារសៀលថ្ងៃទី១៨ ខែសីហា ឆ្នាំ២០១២ លោក ហ៊ុន ម៉ានី អនុប្រធានសមាគមយុវជនកម្ពុជា និងជាទីប្រឹក្សាផ្ទាល់សម្តេចតេជោ ហ៊ុន សែន បានចុះសាកសួរសុខទុក្ខក្រុមយុវជនស្ម័គ្រចិត្តសម្តេចតេជោ ដែលបាននឹងកំពុងធ្វើការវាស់វែងដីធ្លីជូនប្រជាពលរដ្ឋនៅក្នុងស្រុករមាសហែក ។ កម្មវិធីនេះបានធ្វើឡើងក្នុងបរិវេណសាលាស្រុករំដួល ដែលជាទីកន្លែងក្រុមយុវជនបាននិងកំពុងស្នាក់នៅ ដោយមានការចូលរួមផងដែរពីសំណាក់លោក ឌី វិជ្ជា និងលោក ឡាវ វ៉ាន់ និងភ្ញៀវកិត្តិយសជាច្រើនរូបទៀត។
លោក ឡាវ វ៉ាន់ ប្រធានសមាគមយុវជនកម្ពុជាស្រុករមាសហែក បានបញ្ជាក់ថា អស់រយៈពេល២ឆ្នាំ ក្រោមការយកចិត្តទុកដាក់ចង្អុលបង្ហាញពីលោក ឌី វិជ្ជា សមាគមយុជនកម្ពុជាស្រុករមាសហែក បានចូលរួមយ៉ាងសកម្មក្នុងកិច្ចការងារសង្គមជាច្រើន ដូចជាការចុះជួយដកស្ទូង ការជួយសង្គ្រោះពេលមានគ្រោះអាសន្ន ការជួយបណ្តុះបណ្តាលបច្ចេកទេសចិញ្ចឹមសត្វ ការធ្វើកសិកម្ម ការដឹកនាំចូលរួមសកម្មភាពកីឡា សកម្មភាពឃោសនាបោះឆ្នោត និងសកម្មភាពសង្គមជាច្រើនទៀត ជាពិសេសការចូលរួមគាំទ្រ និងស្ម័គ្រចិត្តក្នុងការងារចុះវាស់វែងដីធ្លីជូនប្រជាពលរដ្ឋជាដើម ។
កញ្ញា ប្រាក់ ចន្ទថា យុវនារីស្ម័គ្រចិត្តសម្តេចតេជោ និងជាប្រធានសមាគមយុវជនប្រចាំស្រុករមាសហែក បានបញ្ជាក់ថា ក្រុមយុវជនស្ម័គ្រចិត្តទាំង៣៦នាក់ ចែកចេញជា៣ក្រុម បានចុះវាស់វែងដីធ្លីជូនប្រជាពលរដ្ឋ ចាប់តាំងពីថ្ងៃទី១៣ ខែកក្កដា ឆ្នាំ២០១២ ដែលរហូតមកដល់ពេលនេះក្រុមការងាសម្រេចនូវលទ្ធផលជាច្រើន រួមមាន ការសហការជាមួយគណៈកម្មការវាស់វែងដីធ្លី ដើម្បីធ្វើការកំណត់ព្រំប្រទល់ឃុំ ។ ក្នុងនោះផងដែរ រហូតមកដល់ថ្ងៃទី១៨ ខែសីហា ក្រុមយុវជនស្ម័គ្រចិត្តបានបំពេញការងារសំខាន់មួយចំនួន ដូចជាការប្រកាសតំបន់វិនិច្ឆ័យបាន៣ឃុំ កំណត់ព្រំតំបន់បាន៣៩៨បង្គោល បំពេញសាលាកបត្រ១៣០៩ ស្មើនឹង៩០៤គ្រួសារ វាស់វែងក្បាលដីបាន១.១១៨ក្បាលដី គូសក្បាលដីបាន៩៨៣ក្បាលដីស្មើនឹង៧៩៩,០២ហិកតា គូសផែនទីបានចំនួន៥ផ្ទាំង ស្មើនឹង៩២២,៦៧ហិកតា ។ កញ្ញាបញ្ជាក់ដែរថា បញ្ហាសុខភាព ទីកន្លែងស្នាក់នៅ និងអាហារប្រចាំថ្ងៃមិនមានអ្វីជាបញ្ហាប្រឈមទេ ដោយសារមានការយកចិត្តទុកដាក់ពីប្រជាពលរដ្ឋ អាជ្ញាធរមូលដ្ឋាន ពិសេសពីប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ដែលលោកទាំងពីរតែងតែយកចិត្តទុកដាក់គិតគូជានិច្ចអំពីសុខទុក្ខរបស់យុវជនស្ម័គ្រចិត្ត។ កញ្ញាបញ្ជាក់ដែរថា ទាំងក្រុមយុវជនស្ម័គ្រចិត្ត និងសមាជិកសមាគមយុវជនកម្ពុជាសុទ្ធតែគាំទ្រគោលនយោបាយរបស់រដ្ឋាភិបាល ក្នុងដាក់ចេញជាយុទ្ធសាស្ត្រទាំងអស់នេះ ដែលជាសកម្មភាពផ្តល់ភាពកក់ក្តៅដល់ពលរដ្ឋ និងចូលរួមចំណែកអភិវឌ្ឍន៍ប្រទេសឲ្យឈានឆ្ពោះទៅមុខ ។
លោក ហ៊ុន ម៉ានី អនុប្រធានសមាគមយុវជនកម្ពុជា និងជាទីប្រឹក្សាផ្ទាល់សម្តេចតេជោ ហ៊ុន សែន ក៏បានថ្លែងការកោតសរសើរចំពោះទឹកចិត្តអង់អាចក្លាហាន និងស្ម័គ្រចិត្តបំពេញការងារជូនប្រទេសជាតិ ដោយមិនគិតការនឿយហត់ ។ លោកបានចាត់ទុកថា វាគឺជាការបំពេញភារកិច្ចដ៏ធំសម្រាប់សង្គមជាតិ ដែលជាគំរូដ៏ល្អសម្រាប់យុវជនដទៃ ហើយវាក៏ជាឱកាសឲ្យក្រុមយុវជនស្ម័គ្រចិត្ត ទទួលបានបទពិសោធន៍បំណិនជីវិតកាន់តែច្រើន ។ លោកមានប្រសាសន៍ថា ក្រោយការបញ្ចប់សង្គ្រាម យុវជនមិនបានកាន់កាំភ្លើងដើម្បីប្រយុទ្ធទេ ប៉ុន្តែពួកគេបានជំនួសដោយការកាន់ប៊ិច សៀវភៅដើម្បីសិក្សា និងចូលរួមក្នុងការអភិវឌ្ឍសង្គមឲ្យមានការរីចម្រើន។ ទន្ទឹមគ្នានេះលោកក៏បានពាំនាំនូវការផ្តាំផ្ញើសាក់សួរសុខទុក្ខពីសំណាក់សម្តេចតេជោ និងលោកជំទាវកិត្តិព្រឹទ្ធបណ្ឌិត ដែលលោកតែងតែយកចិត្តទុក្ខដាក់ចំពោះសុខទុក្ខចំពោះក្រុមយុវជនស្ម័គ្រចិត្ត ក៏ដូចជាពលរដ្ឋកម្ពុជាទាំងអស់ ។ លោកក៏បានផ្តាំផ្ញើឲ្យយុវជនទាំងអស់បន្តព្យាយាមបំពេញភារកិច្ច បង្កើនសាមគ្គីភាព ដើម្បីចូលរួមអភិវឌ្ឍប្រទេសជាតិជាមួយរដ្ឋាភិបាល ។ ជាមួយគ្នានេះលោកក៏បានប្រគល់ជូនដល់យុវជនស័គ្រចិត្តនូវអំណោយជាគ្រឿងឧបភោគ បរិភោគ និងថវិកាមួយចំនួនដល់ក្រុមយុវជនស្ម័គ្រចិត្តសម្តេចតេជោផងដែរ៕