រដ្ឋសភាកម្ពុជា និងរដ្ឋសភាវៀត ណាម នឹងរួមគ្នាអបអរសាទរខួបទី៤៥
នៃចំណងមិត្តភាព ទំនាក់ទំនងការទូតរវាងប្រទេសទាំងពីរ
សម្តេចអគ្គមហាពញាចក្រីហេង សំរិន ប្រធានរដ្ឋភាជាតិ នឹងដឹកនាំគណៈប្រតិភូរដ្ឋសភាកម្ពុជា មួយក្រុមទៅប្រទេសវៀតណាម ដើម្បីចូលរួមមិទ្ទិញ អបអរសាទរខួបលើកទី៤៥នៃចំណងមិត្តភាព ទំនាក់ទំនងការទូតរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀត ណាមឆ្នាំ១៩៦៧-២០១២។
យោងតាមសេចក្តីប្រកាសព័ត៌មានរបស់អគ្គលេខាធិការដ្ឋានរដ្ឋសភាបានបញ្ជាក់ថា ដំណើរទៅកាន់ប្រទេសវៀត ណាមនេះ នឹងចាប់ផ្តើមពីថ្ងៃទី២២ខែសីហា និងបន្តស្នាក់នៅទីនោះរហូតដល់ថ្ងៃទី២៥ខែសីហា ឆ្នាំ២០១២ តបតាមការអញ្ជើញរបស់ឯកឧត្តមង្វៀន ស៊ីងហ៊ុង(Nguyen Sinh Hung) ប្រធានរដ្ឋសភាប្រជាជនវៀត ណាម។
មិទ្ទីញអបអរសាទរនោះ ក៏មានការចូលរួមពីថ្នាក់ដឹកនាំសំខាន់ៗនៃប្រទេសទាំងពីរ សមាជិក សមាជិកា រដ្ឋសភា ព្រឹទ្ធសភា រាជរដ្ឋាភិបាល គណៈអភិបាលខេត្ត យុវជនរាជធានី-ខេត្ត ដែលមានព្រំដែនជាប់ប្រទេសវៀត ណាមផងដែរ។
គួរបញ្ជាក់ថា មិទ្ទីញនោះ រដ្ឋសភាកម្ពុជាបានអះអាងថា ជាព្រឹត្តិការណ៍ដ៏សំខាន់ ដើម្បីអបអរឆ្នាំមិត្តភាពកម្ពុជា-វៀត ណាម ឆ្នាំ២០១២ និងខួបអនុស្សាវរីយ៍លើកទី៤៥ នៃថ្ងៃបង្កើតទំនាក់ទំនងការទូតកម្ពុជា-វៀត ណាម និងបង្កលក្ខណៈអោយរដ្ឋសភាកម្ពុជា-វៀត ណាម សហការប្រារព្ធឡើងទុកជាឱកាសសម្រាប់សមាជិក សមាជិកា រដ្ឋសភា ព្រឹទ្ធសភា តំណាងក្រសួង ស្ថាប័ន អាជ្ញាធរមូលដ្ឋាន និងយុវជននៃប្រទេសទាំងពីរ បានជួបជុំផ្លាស់ប្តូរព័ត៌មាន និងពិភាក្សាអំពីកិច្ចសហប្រតិបត្តិការរវាងប្រទេសទាំងពីរសំដៅជម្រុញទំនាក់ទំនងជាប្រពៃណី និងកិច្ចសហប្រតិបត្តិការលើគ្រប់វិស័យអោយបានរឹងមាំយូរអង្វែង៕