ខេត្ដកំពង់ចាម ៖ នៅព្រឹកថ្ងៃទី១៩ ខែសីហា ឆ្នាំ២០១២ លោកឧកញ៉ា អ៊ឹម ប្រុស អនុប្រធានគណៈកម្មាធិការគ្រប់គ្រងគ្រោះមហន្ដរាយខេត្ដកំពង់ចាម តំណាងដ៏ខ្ពង់ខ្ពស់លោក ហ៊ុន ណេង អភិបាលខេត្ដកំពង់ចាម បាននាំយកអំណោយជាទេយ្យទាន មានទៀនព្រះវស្សា អង្ករ ប្រេងម៉ាស៊ូត ភេសជ្ជៈ ថវិកា ទៅប្រគេននិងជូនដល់ចាស់ព្រឹទ្ធាចារ្យ និងប្រជាពលរដ្ឋ សរុបជាទឹកប្រាក់៣៦លានរៀល ជូនដល់វត្ដសុវណ្ណគីរី ភូមិជៀសIIឃុំថ្មពេជ្រ ស្រុកត្បូងឃ្មុំ ។ អំណោយលើកនេះជាលើកទី៥ហើយក្នុងរដូវពេលចូលព្រះវស្សាឆ្នាំរោង ចត្វាស័ក ព.ស២៥៥៦ ។
លោកឧកញ៉ា អ៊ឹម ប្រុស បានបញ្ជាក់ឱ្យដឹងថា ការដង្ហែទៀនព្រះវស្សា និងទេយ្យវត្ថុថ្ងៃនេះហួសថ្ងៃកំណត់នៃបុណ្យចូលព្រះវស្សា អាស្រ័យដោយលោកឧកញ៉ាបានទិញទេយ្យវត្ថុរួចរាល់ហើយ តែដោយជាប់បេសកកម្មមនុស្សធម៌នៅបរទេស ទើបលោកឧកញ៉ាសម្រេចយកថ្ងៃទី១៩ ខែ សីហា ឆ្នាំ២០១២នេះ ប្រគេនព្រះសង្ឃនៅវត្ដសុវណ្ណគីរី ។
លោកឧកញ៉ាបានឱ្យដឹងទៀតថា ពីមុនមកពុទ្ធបរិស័ទចំណុះជើងវត្ដសុវណ្ណគីរីនេះ មានការបែងចែកបក្ខពួកមិនចុះសម្រុងនឹងគ្នា ធ្វើឱ្យសមិទ្ធផលក្នុងវត្ដពុំមានការរីកចម្រើន លុះពេលដំណឹងដឹងដល់លោកឧកញ៉ាបានខិតខំសម្រុះសម្រួល ដោយលោកឧកញ៉ាបានបរិច្ចាគថវិកាកសាងសមិទ្ធផលជាច្រើន ហើយប្រមូលផ្ដុំពុទ្ធបរិស័ទឱ្យសាមគ្គីគ្នាគោរពព្រះពុទ្ធសាសនាតែមួយឡើងវិញ។ លោកឧកញ៉ា អ៊ឹម ប្រុស មានប្រសាសន៍ក្នុងពិធីបុណ្យថា “ ការរួមចំណែកអភិវឌ្ឍន៍ព្រះពុទ្ធសាសនាលុះត្រាតែមានការរួបរួមសាមគ្គីដូចទូកនិងទឹក បើមានទូកខ្វះទឹកក៏មិនអាចចរាចរណ៍បានដែរ យ៉ាងណាមិញ វិស័យព្រះពុទ្ធសាសនាមុនឆ្នាំ១៩៧៩ របបប្រល័យពូជសាសន៍បំផ្លិចបំផ្លាញ ស្ទើរតែរលាយអស់ទៅហើយ ទើបតែក្រោយថ្ងៃរំដោះ ៧មករា ១៩៧៩ មានគណបក្សប្រជាជន ដឹកនាំដោយសម្ដេចទាំង៣ ពិសេសក្រោមការដឹកនាំដ៏ឈ្លាសវៃ និងស្មោះត្រង់ពីសំណាក់សម្ដេចអគ្គមហាសេនាបតីតេជោ ហ៊ុន សែន បានស្ដារអភិវឌ្ឍឡើងវិញពីបាតដៃទទេ រហូតដល់មានហេដ្ឋារចនាសម្ព័ន្ធ ផ្លូវថ្នល់ ស្ពាន សាលារៀនវត្ដអារាមមន្ទីរពេទ្យ ប្រព័ន្ធប្រឡាយទឹក អគ្គិសនីគ្រប់បែបយ៉ាងដូចសព្វថ្ងៃ ដែលធ្វើឱ្យជីវភាពប្រជាពលរដ្ឋមានការរីកចម្រើនឆាប់រហ័សនឹកស្មានមិនដល់ ដូច្នេះហើយយើងជាប្រជាពលរដ្ឋគោរពស្រឡាញ់ ព្រះពុទ្ធសាសនា ត្រូវចូលរួមចំណែកកសាង អភិវឌ្ឍបន្ដទៀតជាមួយរាជរដ្ឋាភិបាល ហើយមិនត្រូវភ្លេចគុណបំណាច់ដ៏ថ្លៃថ្លារបស់ប្រមុខរាជរដ្ឋាភិបាលឡើយ ៕